1 yanvar kuni Yevropa futbol ligalarida qishki transferlar oynasi ochildi va ilk transferlar rasmiylashtirildi. Eng qiziq transferlar esa hali oldinda. Quyida keyingi bir oy davomida qaysi futbolchi qaysi klubga o‘tishi mumkinligi haqidagi so‘nggi xabarlar keltiriladi.
Abduqodir Husanov yana bir grand klub nigohida
«Manchester Siti» O‘zbekiston milliy jamoasi vakiliga qiziqmoqda. Jahon futbolidagi nufuzli insayderlardan biri Fabritsio Romano xabar berishicha, «shaharliklar» klubi «Lans» himoyachisi Abduqodir Husanovni qishki transferlar oynasi uchun short-listiga kiritgan.
Husanov ayni vaqtda Yevropa ligalarida o‘z pozitsiyasida eng yaxshilaridan biri hisoblanadi. Joriy mavsumni yuqori saviyada o‘tkazayotgan 20 yoshli futbolchiga Yevropaning boshqa top-klublaridan ham qiziqishlar mavjud. Dekabr oyida The Telegraph APLning yetti klubi unga qiziqish bildirayotgani, bu klublar qatorida «Tottenhem» va «Nyukasl» nomlari borligini xabar qilgandi. Shuningdek, uning nomi «PSJ» va «Real» bilan ham bog‘langan.
Abduqodir fransuzlar klubiga 2023 yilda 100 ming yevro evaziga Belarusning «Energetik-BGU» klubidan o‘tgandi. U Fransiya chempionatining joriy mavsumida jamoasining asosiy tarkib futbolchisiga aylandi va qator o‘yinlarda eng yaxshi futbolchi deb topildi. Shuningdek, muxlislar talqiniga ko‘ra u liganing 1-davra yakunlariga ko‘ra ramziy jamoasidan joy olgan.
Manchester klublari haqida ishonchli insayder hisoblangan Saymon Baykovskining yozishicha, «Manchester Siti» Husanovni Belarusdagi faoliyatidan boshlab kuzatib keladi.
U Manchester Evening News nashridagi kolonkasida klub unga 2023 yilgi mavsum boshidan buyon qiziqib kelayotgani, faqat o‘sha vaqtda unga asosiy tarkib uchun nomzod sifatida emas, kelajakda tarkibni kuchaytirishi mumkin bo‘lgan istiqbolli futbolchilardan biri sifatida qaragani haqida yozgan.
Transfermarkt portalida uning transfer bahosi 12 mln yevro qilib ko‘rsatilgan. Baykovskining ma’lumotiga ko‘ra, «Lans» uning transferidan kamida 25 mln yevro ishlab olishni ko‘zlagan.
Eldor Shomurodov jamoasini o‘zgartirishi mumkin
Italiyaning «Empoli» klubi o‘zbekistonlik boshqa bir futbolchi Eldor Shomurodovga qiziqish bildirmoqda.
Janluka Di Marsioning ma’lumotiga ko‘ra, italyanlar klubi asosiy hujumchisi Petro Pellegri jarohatlangani tufayli ushbu pozitsiyani mustahkamlash ustida ishlamoqda va «Roma» hujumchisi birinchi variant hisoblanadi.
O‘z navbatida, 29 yoshli futbolchi ham yozda Rim klubiga Artyom Dobvik kelganidan keyin asosiy tarkibga kirish imkoniyatini yo‘qotdi, qolaversa, klubning natijalari yomonlashgach, unga ishonch bildirilmay qo‘ydi. Shomurodov A Seriyaning joriy mavsumida faqat 8 o‘yinda, barchasida zaxiradan tushib ishtirok etgan va ko‘rsatkichlari ham shunga yarasha: 1 gol va 1 assist.
Mavzuga oid
«Barselona» Olmoni olib qola oladimi?
«Barselona» rahbariyati yarimhimoyachi Dani Olmo hamda forvard Pau Viktorni mavsumning ikkinchi davrasi uchun ro‘yxatdan o‘tkazishiga ishonmoqda, deb xabar qiladi Sport.es.
Nashr ma’lumotiga ko‘ra, 2 yanvar kuni klub direktorlari kengashi yig‘ilishi o‘tkazilgan. Menejyerlar uy stadionidagi VIP-joylar sotuvi orqali tushadigan daromadni rasmiylashtirishni so‘ramoqda va shu daromad ikki futbolchini ro‘yxatdan o‘tkazishga yordam beradi deb hisoblamoqda: aynan qo‘shimcha daromad kataloniyaliklarga la liganing iqtisodiy qoidalariga mos kelishga imkon beradi.
Avvalroq, la liga va Ispaniya qirollik futbol federatsiyasi (RFEF) «Barselona»ga Olmo va Viktorni ro‘yxatdan o‘tkazishni rad etgandi.
Olmo «Barselona»ga 2024 yil avgustida «Leypsig»dan kelgandi. O‘shanda klub 26 yoshli ispaniyalikni faqat 2024/25 yillar mavsumining birinchi yarmi uchun ro‘yxatdan o‘tkazishga erishgandi. Yarimhimoyachining shartnomasida agar yanvarda ro‘yxatga olinmasa, klubni erkin agent sifatida tark etishi mumkinligi haqida punkt mavjud.
Mavsumning birinchi davrasida Olmo «Barselona» safida barcha turnirlar doirasida 15 uchrashuvda maydonga tushib, 6 gol urdi va bir golga uzatma berdi.
Trent «Real»ga o‘tishi oydinlashmoqda
The Athletic ma’lumotiga ko‘ra, «Real» va Trentning atrofidagilar o‘rtasidagi norasmiy aloqadan keyin himoyachi Madrid klubiga o‘tishga rozilik bildirgan. Ispaniyadagilar Aleksandr-Arnold bilan yanvardayoq dastlabki kelishuvga erishishni istamoqda. Shuningdek, qaymoqranglilar uni yanvardayoq o‘z safiga qo‘shib olish uchun ingliz klubiga 15 million yevro to‘lashga ham rozi. Mersisaydliklar esa o‘z tarbiyalanuvchisi bilan shartnomani uzaytirishdan umid qilib, hozircha taklifni rad etmoqda.
«Real» angliyalik futbolchiga kamida 4 yillik shartnoma va transferga rozi bo‘lganlik uchun bonus va’da qilmoqda.
Ushbu futbolchi «Liverpul» bilan shartnomasini yangilamayapti va 2025 yil yozida erkin agentga aylanadi. 1 yanvardan u boshqa klublar bilan muzokaralar o‘tkazishi mumkin bo‘ladi.
Aleksandr-Arnold joriy mavsumda barcha turnirlar doirasida 22 o‘yinda maydonga tushib, 1 gol urgan va 5 golga uzatma bergan.
Krishtianu «An-Nasr»dan ketadimi?
Ispaniyaning Marca nashri shunday xabar tarqatdi. Uning ma’lumotiga ko‘ra, Ronaldu «An-Nasr» bilan sovrinlar qo‘lga kiritmayotganidan norozi va yaqin vaqtlar ichida klubni tark etish haqida o‘ylamoqda — 2025 yil qishida yoki shartnomasi muddati tugaydigan yozda. Portugaliyalik futbolchi faoliyatini yakunlamoqchi emas, shunday ekan, u Yevropaga qaytishi mumkin.
OAVda u Parijga kelishi mumkinligi haqida xabarlar tarqalgandi, insayder Fabritsio Romano «PSJ» va u o‘rtasida hech qanday muzokaralar o‘tkazilmayotganini ma’lum qildi.
Bu vaqtda esa Goal tez orada uning «Real»dagi sobiq jamoadoshi Kazemiro Saudiya klubiga o‘tishi va ular yana birgalikda to‘p surishi mumkinligi haqida xabar tarqatgan.
«PSJ» Salohni ko‘z ostiga olgan
«Liverpul»ning yozda erkin agentga aylanadigan, 1 yanvardan boshqa klublar bilan muzokaralar o‘tkazish huquqiga ega bo‘lgan yana bir futbolchisi Muhammad Saloh Fransiyaga ko‘chib o‘tishi mumkin. Jurnalist Romen Kolle Godendagi ma’lumotlarga ko‘ra, «PSJ» 32 yoshli misrlikka haftasiga 500 ming yevrolik maoshni nazarda tutuvchi uch yillik shartnoma taklif qilishga tayyor.
«Liverpul»ning taklifi esa ikki yillik va maosh miqdori ham kamroq - haftasiga 400 ming yevro.
Joriy mavsumda Saloh barcha turnirlar doirasida 26 o‘yinda maydonga tushib, 20 gol urdi va 17 assistni o‘z nomiga yozib qo‘ydi. Transfermarkt portali uning qiymatini 55 million yevroga baholagan.
Vlahovich «Arsenal»ga o‘tadimi?
Jurnalist Rudi Galettining xabariga ko‘ra, Dushan Vlahovich «Yuventus»dan «Arsenal»ga o‘tishi mumkin. London klubi 24 yoshli serbni qishki transferlar oynasidagi ustuvor maqsadi sifatida belgilab olgan.
Vlahovichga muqobil variantlar sifatida «Arsenal» «Brentford»dan Brayan Mbeumo, «Bavariya»dan Leroy Sane va Dortmundning «Borussiya» klubidan Jyeymi Bayno-Gittensni ko‘rmoqda.
Vlahovich turinliklar klubida 2022 yil yanvaridan buyon to‘p surib kelmoqda. Joriy mavsumda u barcha turnirlar doirasida 22 o‘yinda maydonga tushib, 12 gol urgan va ikki golga uzatma bergan. Transfermarkt portali forvardni 60 million yevroga baholagan.
Grilish «Tottenhem»ga o‘tishga yaqin
2024 yil Jyek uchun muvaffaqiyatsiz kechdi — u yil mobaynida birorta gol urolmadi. Bir necha yil muqaddam 117 million yevro to‘lab sotib olingan futbolchi uchun qo‘rqinchli statistika. Grilish Gvardiola tizimida boshqa funksiyalari bilan foydali ekani tushunarli, ammo raqamlar baribir undagi yaqqol inqirozni namoyon etib turibdi. Qishda u ijara asosida «Tottenhem»ga o‘tishi haqida xabarlar chiqqani bejiz emas. Unga «Nyukasl» ham talabgor.
«Siti» nishonidagi futbolchi «Real»ga o‘tishi mumkin
Martin Subimendi faoliyatini «Real»da davom ettirishi mumkin. As ma’lumotiga ko‘ra, madridliklar «Real Sosiyedad»ning 25 yoshli yarimhimoyachisini yozda faoliyatini yakunlagan Toni Kroosga o‘rinbosar sifatida ko‘rmoqda.
Xabar qilishlaricha, Subimendi transferi ispan grandining yosh ispaniyaliklarni safga qo‘shib olishga urg‘u qaratilgan strategiyasiga ham to‘g‘ri keladi. «Real» ushbu kelishuvni hozirda hal qilib, 2025 yil yozida uni safga qo‘shib olmoqchi.
Ushbu futbolchiga bundan oldinroq «Manchester Siti»dan ham jiddiy qiziqish bildirilayotgandi, inglizlar klubi uni Rodriga o‘rinbosar sifatida ko‘rmoqda.
Joriy mavsumda Martin «Sosiyedad» safida barcha turnirlar doirasida 21 o‘yinda maydonga tushib, bir gol urgan va bir golga hammualliflik qilgan.
Reshford Saudiya Arabistoniga ketishga rozi bo‘lmadi
«Manchester Yunayted» hujumchisi Markus Reshford Saudiya Arabistonining uch klubidan bo‘lgan taklifni rad etdi, deb xabar beradi The Times. Ulardan biri — yiliga 35 million funtlik maosh taklif etgandi.
Manba ma’lumotiga ko‘ra, «MYu» kelajagidan o‘rin olmagan Reshford (klub uni qishda sotishga yoki ijaraga berishga tayyor), hamon Angliya milliy jamoasidan chaqiruv olishdan umid qilmoqda va buning uchun Yevropaning kuchli ligalarida to‘p surishi zarurligini tushunib turibdi.
Xuddi shu sababga ko‘ra, hujumchi Turkiya klublarini ham rad etgan.
