21:46 / 17.02.2021
21801
Ким Чен Иннинг рафиқаси бир йил ичида илк марта оммага кўриниш берди

Шимолий Корея раҳбари Ким Чен Иннинг рафиқаси Ли Сол Жу бир йилдан ошиқ вақтдан бери илк марта жамоатчилик олдида кўриниш берди. КХДРдаги давлат нашрлари хабарига кўра, Ли Сол Жу турмуш ўртоғи билан унинг марҳум отаси, мамлакатнинг аввалги раҳбари Ким Чен Ир туғилган кун шарафига бағишланган концертга ташриф буюрган.

«Нодон синмун» газетаси маълумотига кўра, сешанба куни биринчи леди ўз турмуш ўртоғи билан «Мансудэ» театрида олқишлар остида қарши олинган. 

Концертда Ким Чен Ирни мадҳ этган қўшиқлар, шунингдек, бош котиб Ким Чен Иннинг шарафига ёзилган асарлар ижро этилган.

Нашр тарқатган суратда Ким ва рафиқаси ёнма-ён ўтириб, табассум билан спектаклда қарсак чалаётгани акс этган. Бош котибнинг рафиқаси концерт учун тўғноғич билан безатилган тўқ кўк рангдаги костюм кийган. Эътиборлиси, концертга келганларнинг ҳеч бири тиббий ниқоб тақмаган ва ижтимоий масофа сақлашга риоя этилмаган.

Ли Сол Жу аввал ҳам бир неча марта турмуш ўртоғи билан оммавий тадбирларга бирга келганди, аммо ўтган йилнинг январидан буён ОАВда у ҳақда ҳеч қандай хабар чиқмаган. Ўшанда у ва турмуш ўртоғи Янги йил муносабати билан «Самжиэн» мусиқий театрининг байрамона томошасига борганди.

КХДРнинг биринчи хонимининг узоқ вақт давомида оммага кўриниш бермаслиги унинг соғлиги ёмонлашгани ёки у ҳомиладор экани ҳақидаги миш-мишларни келтириб чиқарганди. Шунингдек, таҳлилчилар Ли Сол Жу мамлакатдан қочиб кетган деган тахминни илгари сурганди.

Шу билан бирга, Шимолий Корея Миллий разведка хизмати парламентарийларни Ли Сол Жу сўнгги вақтларда коронавирусдан зарарланишдан қочиб оммавий тадбирларда иштирок этмагани ва кўп вақтини болалар билан ўтказгани ҳақида хабардор қилгани ҳақида хабарлар бор.

Бугунги кунга қадар КХДР ҳукумати мамлакатда коронавирусга чалиниш билан боғлиқ бирорта ҳолат ҳақида хабар бермаган, аммо экспертлар пандемия ушбу мамлакатни четлаб ўтганига шубҳа билан қарашади.

Ли Сол Жу ким?

Ким Чен Иннинг рафиқаси ҳақида маълумотлар деярли йўқ, ҳатто у қачон туғилгани ҳам маълум эмас. У КХДРнинг зиёлилар қатламига мансуб, отаси ўқитувчи бўлган, онаси – шифокор.

ОАВ маълумотига кўра, Ли муқаддам аъзолари ҳукумат томонидан тасдиқланадиган элита мусиқа гуруҳи - Инхасу оркестрида қўшиқ куйлаган.

Таҳлилчи Чон Сон-чангнинг сўзларига кўра, Ли Сол Жу 2009 йилда Кимга турмушга чиққан – Ким Чен Ир кексайиб қолгани муносабати билан тўй тезлаштирилган, у 2008 йилда инсультни бошдан кечиргани айтилади. Никоҳ ҳақида Шимолий Корея ОАВ томонидан расман 2012 йилда эълон қилинганди.

КХДР раҳбарларининг рафиқалари орасида биринчи марта Ли Сол Жу турмуш ўртоғи билан жамоатчилик олдида кўриниш берган. Ли Сол Жу жамоат майдонида бўлмаган пайтда Шимолий Корея етакчиси расмий тадбирларга ўзининг собиқ севгилиси, шимолий кореялик поп юлдузи Хён Сон Вол билан келган.

Жанубий Корея нашрлари маълумотига кўра, Ким Чен Ин ва Ли Сол Жу оиласида уч фарзанд туғилган.

Америкалик баскетболчи, Ким Чен Иннинг дўсти Деннис Родман ушбу жуфтликнинг қизига Жу Э деб исм қўйилгани, шунингдек, Ким яхши ота экани ҳақида гапириб берганди.

Шимолий Корея нашрлари хабарига кўра, театрга келишдан олдин Ким Чен Ин отаси ва бобоси дафн қилинган Кимсусан мемориал мажмуасини зиёрат қилган.

КХДРдаги давлат агентликлари Ким Чен Инни яна президент деб атай бошлашгач, бунгача «раис» атамаси қўллаб келинаётганди. Шимолий Корея марказий телеграф агентлиги ўтган ҳафтада «президент» атамасидан фойдаланган.

Аввал КХДР президенти рутбаси Ким Чен Иннинг бобоси, Шимолий Корея асосчиси Ким Ир Сенга нисбатан қўлланган, у 1998 йилдан кейин «КХДРнинг абадий президенти» деб атала бошланган. Унинг ўғли ва вориси Ким Чен Ир эса «КХДРнинг буюк раҳбари» мақомини олган. Кейинчалик у «Йўлчи юлдуз» деб ҳам аталган.

Top