Qurilish bo‘ladigan bog‘lardagi daraxtlar xatlanadi, lekin himoya qilinadimi? - Ekoinspeksiya javobi

— Biror hududda qurilish boshlanishidan oldin u yerdagi daraxtlar xatlovdan o‘tkazilgan bo‘lsa, ular kesib yuborilmayotgani qurilish davom etayotgan paytda nazorat qilib boriladimi? Masalan, hozir «G‘afur G‘ulom» bog‘i va Milliy bog‘da qurilish ishlari ketyapti.

— Vazirlar Mahkamasining 43-sonli qaroriga muvofiq, yirik shaharlar va boshqa aholi punktlaridagi daraxtlar inventarizatsiya qilinishi belgilangan. Hozirga qadar muayyan ishlar qilindi, muayyan hududlar tekshirilib, tegishli reyestrga kiritilgan. Bu boradagi ishlar hali oxiriga yetmagan. Hozir qaysi hududda nechta daraxt borligi sanab chiqilgani haqida ma'lumot berish uchun ma'lumotlar bazasiga kirishim kerak.

Ammo bu borada ishlar olib borilyapti va shu yil davomida oxiriga yetkaziladi.

«G‘afur G‘ulom» va Milliy bog‘laridagi daraxtlar statistikasi bo‘yicha hozir menda ma'lumot yo‘q. Agar huquqbuzarlik sodir etilgani aniqlansa, joyiga chiqib, nechta daraxt qolganiga qarab nechtasi kesilganini aniqlash mumkin.

— Bu kabi joylardagi daraxtlar qurilish boshlanishidan avval xatlovdan o‘tkaziladi. Bevosita qurilish davomida-chi?

— Bu borada meni o‘ylantirib qo‘ydingiz. Haqiqatan ham inspeksiya, uning hududiy bo‘limlari qurilish davom etayotgan paytdagi holatga e'tibor qaratishi lozim. Fikringizga qo‘shilaman. Bu masala bo‘yicha yaqin soatlarda shug‘ullanamiz. Va bu haqda albatta jamoatchilikka ma'lum qilamiz.

— Oqova suvlar tarkibida zaharli moddalarni suv havzalariga oqizayotgan, havoga zararli chiqindilar chiqarayotgan, qurilishlar qilish uchun hududni o‘rab olib, hech kimga bildirmay daraxtlarni kesayotgan xususiy tadbirkorliklar hududiga kirishda ekologiya inspektorlarida muammolar bormi?

— Yo‘q, bu borada muammo yo‘q. Qonunchilikdagi so‘nggi o‘zgarishlarga muvofiq, biz istalgan hududga kirish imkoniyatiga egamiz. Faqat buning uchun o‘sha obekt egasini oldindan ogohlantirishimiz zarur.

Daraxtlarning noqonuniy kesilishi, hayvonlarni noqonuniy ovlash va zaharli moddalar ajralishiga sabab bo‘ladigan chiqindilarni yoqish va boshqa holatlarda biz xususiy obektlarni tekshirish huquqiga egamiz. Bunday ro‘yxat mavjud. Inspektorlar buning uchun voqea sodir bo‘lganidan keyin 24 soat ichida tekshirishlari mumkin. Faqat bizga qonunbuzilish holatlari aynan qayerda bo‘layotgani va qaysi sub'yekt qonunni buzayotgani haqidagi ma'lumot kerak. Buning uchun biz jamoatchilik ko‘magiga tayanamiz.

Daraxtlar kesilganini ko‘z bilan ko‘rib aniqlash mumkin, biroq boshqa holatlarda, deylik, suv, havo yoki yer ifloslantirilganida faqat qurilmalar yordamidagina aniqlash imkoni bor. Laboratoriya xodimlari jalb qilinib, holat aniqlashtirilgach, protokol tuziladi va shu asosda tekshiruv boshlash mumkin. Tekshirish 10 kun muddat ichida amalga oshiriladi.