12:46 / 24.02.2021
2196
Филиппин вакцина эвазига Европага минглаб тиббий ходимларини жўнатмоқчи
Фото: Reuters

Филиппин ҳукумати ҳозирда тақчил воситага айланган коронавирусга қарши вакцина эвазига Европага минглаб ходимларини ишга жўнатмоқчи. Филиппинга 70 млн катта ёшли аҳоли учун вакцина зарур, бунинг учун ҳукумат 148 млн доза вакцинани захиралаб қўймоқчи.

Филиппин Британия ва Германияга коронавирусга қарши вакцина эвазига бир неча минг тиббий ходимини, жумладан биринчи навбатда ҳамшираларни ишга жўнатмоқчи.  Бу ҳақда Филиппин меҳнат вазирлиги вакилига таяниб Reuters ахборот агентлиги хабар берди.

Хозирда Филиппинда йилига кўпи билан 5000 кишига хорижга чиқиб тиббий ходим сифатида ишлашга рухсат берилган. Вазирликда таькидланишича, ҳукумат вакциналарнинг бепул етказилиши эвазига бу чекловни олиб ташлашга тайёр.

Шунингдек жорий ҳафтада Филиппинга Хитойдан бепул вакцинанинг илк партиялари келиши кутилмоқда. 

Бироқ Филиппин ҳукуматининг Европага ўз тиббий ходимларини жўнатиш таклифи мамлакат тиббий ходимлари орасида хушланмаяпти.

“Ҳукумат ҳамширалар ва соғлиқни сақлаш ходимларига қандайдир хомашё ёки экспорт маҳсулот сифатида қараётгани жирканч холатдир”, деб айтган Filipinо Nurses United ташкилоти раҳбари Жоселино Андамо.

Бироқ Германия ва Британия ҳукумати ҳозирча Филиппиннинг бу таклифига ҳеч қандай муносабат билдирмаган.

Top