«Hech qanday rasmiy qaror e'lon qilinmagan» - Din ishlari bo‘yicha qo‘mita Haj mavsumi bilan bog‘liq xabarlarga munosabat bildirdi

Qayd etilishicha, Din ishlari bo‘yicha qo‘mita Saudiya Arabistoni rasmiylari hamda Haj va Umra ishlari bo‘yicha attashe bilan mazkur masalada muntazam aloqa o‘rnatgan. 

Ijtimoiy tarmoqlarda “Muqaddas Haj safariga rasman ruxsat berildi. Faqatgina haj safariga bormoqchi bo‘lganlar koronavirusga vaksina qabul qilgan bo‘lishlari shart” va boshqa shu kabi sarlavhalar ostida tarqatilayotgan xabarlar hech qanday rasmiy asosga ega emasligi aytiladi.

Bildirilishicha, bu kabi xabarlar tarqalishi va turlicha talqin qilinishi Saudiya Arabistoni sog‘liqni saqlash vazirining “Haj mavsumi ziyoratchilarini qabul qilishning asosiy sharti – COVID-19'ga qarshi emlangani bo‘ladi”, mazmunidagi intervyusiga asoslangan.

Haj va Umra tadbirlarini tashkil etish bo‘yicha Saudiya Arabistoni hukumati tomonidan hozirga qadar hech qanday rasmiy qaror e'lon qilinmagani qayd etildi.

“Hurmatli yurtdoshlar! Haj va umra ziyoratlari bilan bog‘liq asosli ma'lumotlar Din ishlari bo‘yicha qo‘mitaning rasmiy veb-sayti va ijtimoiy tarmoq sahifalari orqali e'lon qilinadi. Shu o‘rinda, yurtdoshlarimizdan yuqoridagi kabi asossiz va chalg‘ituvchi xabarlarga ishonmasliklarini so‘rab qolamiz”, deyiladi ma'lumotda.

Avvalroq, Saudiya Arabistoni joriy yildagi haj ziyoratining asosiy shartini ma'lum qilgandi.