20:16 / 12.03.2021
2261
Япония ва Ўзбекистон ўртасида 6та грант шартномаси имзоланди

Япония билан соғлиқни сақлаш тизимини такомиллаштириш ва соҳани замонавий тиббиёт ускуналари билан таъминлаш мақсадида қиймати 500 минг долларга тенг бўлган 6та грант шартномаси имзоланди.

Бугун, 12 март куни Ўзбекистон-Япония марказида «Кичик миқёсли ижтимоий лойиҳаларга беғараз ёрдам» дастури бўйича шартнома имзоланди. «Дунё» нашри маълум қилишича, тадбирда соғлиқни сақлаш тизимини такомиллаштириш ва соҳани энг сўнгги тиббиёт ускуналари билан таъминлаш мақсадида қиймати 500 минг долларлик 6та грант шартномаси имзоланган.

«Бугунги кунгача кичик миқёсли ижтимоий лойиҳаларга беғараз ёрдам дастури асосида ҳамкорликда умумий қиймати 28,5 миллион долларлик тўрт юздан зиёд келишув ва лойиҳалар амалга оширилди», деди Япония элчихонаси вакили Атсуши Суда.

Шартномага кўра, ажратилган маблағлар Республика ихтисослаштирилган онкология ва радиология маркази Фарғона ва Қорақалпоғистон филиаллари, Гулистон шаҳар тиббиёт бирлашмаси акушерлик мажмуаси, Республика ихтисослаштирилган онкология ва радиология маркази, Жиззах вилояти Фориш туман тиббиёт бирлашмаси ҳамда Фарғона вилояти халқ таълими бошқармасига қарашли кўзи ожиз ва кар ўқувчиларга ихтисослаштирилган таълим муассасаси каби қатор ташкилотларни замонавий ускуналар билан таъминлашга йўналтирилади.

Top