Merkel bir kun ilgari joriy etilgan karantinni bekor qildi va aholidan uzr so‘radi

Germaniya kansleri Angela Merkel Pasxa bayrami kunlariga joriy etilgan karantin uchun fuqarolardan uzr so‘radi va uni bekor qildi. Bu haqda Deutsche Welle xabar bermoqda.

Merkel  «yaxshi maqsadda» — koronavirusning uchinchi to‘lqini tarqalishini sekinlashtirish uchun Pasxa kunlariga karantin e'lon qilingani, ammo bu noto‘g‘ri qaror bo‘lganini aytdi.

“Bu faqat mening xatom, buning uchun men javobgarman”, – deb ta'kidladi u va barcha fuqarolardan uzr so‘radi.

 Merkel 22 mart kuni mamlakatda karantin rejimi 18 aprelgacha uzaytirilganini e'lon qilgandi. Pasxa davrida — 1 apreldan 5 aprelgacha esa karantin rejimi yanada kuchaytirilishi ko‘zda tutilgandi.

Robert Koh nomidagi institut bergan ma'lumotlarga ko‘ra, Germaniyada koronavirus yuqtirganlar soni 2,7 million nafarga yetgan, 75 ming nafarga yaqin kishi vafot etgan.