10:43 / 08.04.2021
3059
Мянманинг Лондондаги элчиси элчихонага киритилмаётганини маълум қилди  

Мянманинг Британиядаги элчиси Чжо Зо Мин Лондондаги элчихонага киритилмаётганини маълум қилди. Аввалроқ у ҳарбийлар томонидан ҳибсга олинган Мянма президенти Вин Минт ва давлат маслаҳатчиси Аун Сан Суу Чжини озод қилишга чақирганди.  

Мянма элчисининг CNN телеканалига маълум қилишича, у 7 апрел куни бир неча соат давомида элчихонага киришга уринган, бироқ бунинг уддасидан чиқа олмаган. Унинг элчихонага қилган қўнғироқлари ва юборган электрон мактублари жавобсиз қолдирилган.   

“Улар мени ичкарига киритишмаяпти. Уларнинг айтишича, бу ҳақида пойтахтдан кўрсатма олишган ва шу сабабли мени элчихонага киритишмоқчи эмас. Бу тўнтарувдир. Бу Британия, биз Мянма ёки Бирмада эмасмиз”, деб айтган элчи. 

Март ойида Чжо Зо Мин мянмалик ҳарбийлар томонидан феврал бошида ҳибсга олинган Мянма президенти Вин Минт ва давлат маслаҳатчиси Аун Сан Суу Чжини озод қилишга чақирганди. Элчи бу баёнотидан кейин ҳарбийлар томонидан ортга чақиртирилганди. 

Мянма элчисини қўллаб-қувватлаш учун Лондондаги элчихона олдида 50 га яқин одам тўпланган. Воқеа жойига полициячилар етиб келиб, одамларни тарқалишга ва карантинни бузмасликка чақирган. 

Ўз навбатида, Британия ташқи ишлар вазирлигида юзага келган вазият бўйича қўшимча маълумот олишга ҳаракат қилинаётгани маълум қилинган. 

1 февралда Мянмада ҳарбий тўнтарув амалга оширилганди. Ҳарбийлар мамлакат президенти, давлат маслаҳатчиси ва бир қатор юқори мансабдор шахсларни ҳибсга олишган.  

Мамлакат қуролли кучлари бош қўмондони Мин Аунг Хлайн қонунчилик, ижрочилик ва суд ҳокимиятларини ўз қўлига олган. Президент вазифасини бажариш вице-президент Минт Швега топширилган. Шунингдек, ҳарбийлар мамлакатда бир йилга фавқулодда ҳолат киритилишини эълон қилишган.  

Ҳарбийларнинг хатти-ҳаракатлари аҳоли томонидан норозилик намойишларига олиб келган. Бу намойишлар хавфсизлик кучлари томонидан кескин тарзда бостирилмоқда. Охирги маълумотларга кўра, намойишларни бостириш вақтида 600 га яқин одам ўлдирилган.  

Top