O‘zbekistonning Jazoirdagi birinchi elchisi tayinlandi

Qisqa marosimdan so‘ng bo‘lib o‘tgan suhbatda tomonlar O‘zbekiston va Jazoir o‘rtasidagi hamkorlikni kengaytirish istiqbollarini muhokama qildi. Jazoir tashqi ishlar vaziri Ahmad Attaf siyosiy aloqalar darajasini yuqori baholab, savdo-iqtisodiy va boshqa yo‘nalishlardagi hamkorlikni chuqurlashtirish muhimligini ta’kidladi.

Ahmad Attaf 50 million aholiga ega Jazoirda O‘zbekiston to‘qimachilik kompaniyalari ishlab chiqarishni yo‘lga qo‘yib, keyinchalik mahsulotni Afrika bozoriga bojsiz eksport qilishi mumkinligini bildirdi. Shuningdek, u mamlakat iqtisodiy zonalarida savdo uylari, omborxonalar va ko‘rgazma zallarini tashkil etish, ishbilarmonlar kengashini shakllantirish hamda hukumatlararo komissiya faoliyatini yo‘lga qo‘yishni taklif qildi.

Suhbatda ta’lim, tibbiyot va parlamentlararo hamkorlik yo‘nalishlarini kengaytirish masalalariga ham alohida e’tibor qaratildi. Ahmad Attaf prezident Shavkat Mirziyoyev rahbarligida O‘zbekistonda amalga oshirilayotgan islohotlar va mamlakat taraqqiyotini yuqori baholashini bildirgan.

Uchrashuv yakunida Jazoir tashqi ishlar vaziri O‘zbekiston tashqi ishlar vazirining mamlakatga tashrifini kutayotganini ma’lum qilib, hamkasbiga samimiy salomini yetkazishni so‘radi. Shuningdek, u O‘zbekiston elchisining Jazoirdagi faoliyati uchun barcha zarur sharoitlarni yaratish va amaliy yordam ko‘rsatishga tayyorligini bildirdi.

47 yoshli Mansur Qilichev Toshkent davlat sharqshunoslik universiteti bitiruvchisi hisoblanadi. U 2002 yildan buyon Tashqi ishlar vazirligi tizimida ishlab kelmoqda va Saudiya Arabistoni hamda Dubaydagi diplomatik vakolatxonalarda faoliyat yuritgan. 2021 yil oktyabridan buyon esa O‘zbekistonning Misrdagi favqulodda va muxtor elchisi hisoblanadi.