08:08 / 09.04.2021
8692
Британиянинг энг бой одамларидан бири ўз уйида ўлдириб кетилди 
Фото: Danny Lawson

Британиянинг энг бой одамларидан бири, 83 ёшли Ричард Саттон Англиянинг жанубида жойлашган уйида ўлдириб кетилди. The Times нашрининг хабар беришича, бир нечта меҳмонхона эгаси бўлган тадбиркор 7 апрелда Гилленгем шаҳри яқинидаги уйида пичоқлаб кетилган

Саттонни тан жароҳатлари билан қўшниларидан бири аниқлаган ва полиция чақиртирган. Жиноят жойига келган полиция Саттоннинг соат 21:15да ўлганини қайд қилган. 

Бундан ташқари, тадбиркорнинг 60 ёшли рафиқаси ҳам пичоқланган. У вертолётда Бристолдаги шифохонага етказилган ва ҳозирда аҳволи оғир деб баҳоланмоқда. 

Полиция ушбу жиноят бўйича гилленгемлик 34 ёшли эркакни қўлга олган. Таъкидланишича, у Саттон билан таниш бўлган. The Times’нинг хабар қилишича, полициячилар қотилликда гумонланаётган эркакнинг Саттоннинг уйидан Range Rover машинасида Лондон томон кетганини тезликда аниқлашган. Шундан кейин машина ортидан қарийб 200 км кузатиб борилиб, сўнгра эркак Лондонда қўлга олинган. Гумонланувчи ҳам жароҳатланган бўлган ва шифохонага етказилган.  

Қотиллик сабаби маълум қилинмаган, унинг юзасидан тергов бошланган. 

Ричард Саттон 301 млн фунт стерлинг (415 млн доллар) бойлик билан Британиянинг энг бой одамлари рўйхатида 435-ўринни эгаллаган. Унга бир нечта меҳмонхоналар, жумладан, Лондондаги 5 юлдузли Sheraton Grand ва Ateneum тегишли бўлган.

Top