11:30 / 19.04.2021
1720
Ўзбекистонда бу йил нефт-газ ва энергетика кўргазмалари ўтказилмайди

Ўзбекистон Энергетика вазирлиги кўргазма фаолияти билан боғлиқ қатор хабарлар юзасидан баёнот берди

Вазирлик матбуот хизмати хабарига кўра, 2021 йилда нефт-газ ва энергетика кўргазмаларини ўтказиш режалаштирилмаган.

“Ҳозирги кунда COVID-19 пандемияси билан боғлиқ бўлган эпидемиологик вазият туфайли 2021 йилда Ўзбекистонда анъанавий (йиллик) кўргазма тадбирларини ўтказиш режалаштирилмаган.

Бу “Ўзбекистон нефт ва газ – OGU”, шунингдек, “Энергетика, энергияни тежаш, атом энергетикаси, муқобил энергия манбалари – Power Uzbekistan” каби халқаро кўргазмаларга ҳам тегишли”, дейилади баёнотда.

Қайд этилишича, мазкур кўргазмаларда иштирок этишни режалаштирган барча компаниялар ушбу маълумотни қабул қилиши лозим.

Бундан олдин, Ўзбекистонда коронавирус юқтириш ҳолатлари кескин ошаётгани сабабли 18 апрелдан карантин назорати кучайтирилгани хабар берилганди. Республикада умумий овқатланиш муассасаларида ва автобусларда ўринлар 50 фоизгача чекланди. Шунингдек, 1 майдан концерт ва томошалар каби оммавий тадбирларни ёпиқ маданият саройларида ўтказиш чекланади.

Top