14:40 / 21.04.2021
5566
Солиқ тўловчилардан ортиқча тўлов олинишига йўл қўйган 19та туман ДСИ раҳбарлари жазоланди

Давлат солиқ қўмитаси солиқ тўловчилардан ортиқча тўлов ундирилиши ноқонунийлигини маълум қилди, бунга йўл қўйган 19та туман ДСИ раҳбарлари жазоланган.

ДСҚ матбуот хизмати хабарига кўра, 2021 йил I чоракда ортиқча тўловлар ундирилишига йўл қўйган 3та туман ДСИ раҳбари билан тузилган меҳнат шартномаси бекор қилинган. Бундан ташқари, яна 16та туман ДСИ раҳбарларига «ҳайфсан» берилди ҳамда махсус унвони даражаси пасайтирилди.

Хабарда солиқ тўловлари бўйича белгиланган мажбуриятини бажарган шахслардан ортиқча тўлов талаб қилиш ноқонунийлиги таъкидланган.

«Давлат солиқ қўмитаси ҳудудий давлат солиқ органлари ходимларини солиқ тўловчилардан ортиқча тўлов талаб қилмасликлари юзасидан қатъий огоҳлантирди. Ортиқча тўловлар олинишига йўл қўйилган тақдирда ДСҚ томонидан қонуний чоралар кўрилади», - дейилади расмий хабарда.

Aввалроқ, ижтимоий тармоқларда солиқ органи ходимлари сотувчи аёлларнинг буюмларини тортиб олишга уриниб, ерда судрагани акс этган видео тарқалганди. Ҳолат тармоқда кенг муҳокамаларга сабаб бўлди.

Шундан сўнг Давлат солиқ қўмитаси раиси Шерзод Кудбиев ушбу ҳолат акс этган видео бўйича муносабат билдириб, солиқчиларнинг хатти-ҳаракати учун узр сўради.

Давлат солиқ қўмитаси юз берган воқеадан сўнг Олмалиқ шаҳар Давлат солиқ инспекциясининг 11 нафар ходими, жумладан, воқеада бевосита иштирок этган уч нафар солиқ инспектори ишдан бўшатилгани ва уларнинг барча махсус унвонлари бекор қилинганини маълум қилди.

Top