Davlat soliq qo‘mitasi rahbariyati tadbirkorlar bilan uchrashdi

2022 yil 22 iyul kuni Davlat soliq qo‘mitasi rahbariyati tadbirkorlar va ishbilarmonlar bilan uchrashdi. Unda 200 nafarga yaqin tadbirkor ishtirok etdi. Ikki yarim soatdan ortiq vaqt davom etgan uchrashuvda bir tomonlama EHF, onlayn-NKMlardan foydalanish, cheklarni tahrirlash, tadbirkorlik sub’yektlarini davlat ro‘yxatidan o‘tkazish, QQS guvohnomasining amal qilishini to‘xtatib turish, yer va mol-mulk solig‘i, ortiqcha to‘langan soliqlarni qaytarish, inkasso topshiriqnomalari, shuningdek, soliq organlari bilan qayta aloqa kabi tadbirkorlar tomonidan ko‘tarilgan masalalar muhokama qilindi.

Uchrashuv murojaatlar yechimi yuzasidan dastlabki natijalar

“PLUS PROMOTION” MChJ tomonidan yo‘llangan QQS summasini tezlashtirilgan tartibda qaytarish bo‘yicha murojaat ijobiy hal etildi. Murojaat QQS zanjiridagi soliq uzilishlarini real vaqt rejimida tekshirish imkonini beruvchi avtomatlashtirilgan tizim yordamida o‘rganib chiqildi va korxona tomonidan hisobga olingan 1,1 mlrd so‘m QQS summasi qaytarildi.

Shuningdek, “MONOLITH ASIA” MChJning ayni mazmundagi murojaati ham o‘z yechimini topdi. Korxonaga 1,6 mlrd so‘m miqdoridagi QQS summasi qaytarildi.

Toshkent shahar madaniyat bosh boshqarmasi yuridik manzili Mirzo Ulug‘bek tumanidan Mirobod tumaniga o‘zgargan bo‘lsa-da, JShODS va ijtimoiy soliq to‘lovlari Mirzo Ulug‘bek tumaniga to‘lab kelingan.

Natijada, Mirobod tumanida korxonaning 108 mln so‘m qarzdorligi hosil bo‘lgan va 2,1 mln so‘m penya hisoblangan. To‘langan soliqlar Mirobod tumanidagi shaxsiy hisobvaraqlariga o‘tkazilib, hisoblangan penyalar bartaraf etildi.

DSQ raisi uchrashuvda tadbirkorlar tomonidan ko‘tarilgan muammolarni qisqa muddatda hal etish yuzasidan mutasaddilarga tegishli topshiriqlar berib, bunday uchrashuvlarning muntazam tashkil etilishi soliq to‘lovchilar bilan samarali konstruktiv muloqot o‘rnatish imkonini berayotganini ta’kidladi.

DSQ Matbuot xizmati