17:39 / 26.04.2021
6630
Экспертлар Тожикистоннинг солиқ сиёсати аҳоли қашшоқлиги ўсишига сабаб бўлаётганини айтишди

Янги Орлеандаги университет мутахассислари «Тожикистондаги қашшоқлик ва тенгсизликка фискал сиёсатнинг таъсири» деб номланган 40 саҳифадан иборат таҳлилий ҳисобот тайёрлади.

Фото: Asia-Plus

Тожикистон бюджет-солиқ сиёсати мамлакатда қашшоқлик ва тенгсизлик даражасининг ўсишига сабаб бўлмоқда, дейилади АҚШдаги Тулейн университети (Tulane University) тадқиқотида.

Янги Орлеандаги университет мутахассислари «Тожикистондаги қашшоқлик ва тенгсизликка фискал сиёсатнинг таъсири» деб номланган 40 саҳифадан иборат таҳлилий ҳисобот тайёрлаган.

Экспертларнинг хулосасига кўра, республика аҳолисининг камбағал қатламига тушадиган солиқ юкламаси жуда юқори бўлиб, у қашшоқликни камайтириш бўйича кўрилаётган чораларга халақит бермоқда ҳамда мамлакатдаги бойлар ва камбағаллар орасидаги тафовут кучайишига сабаб бўлмоқда.

Ҳисобот муаллифлари қашшоқларга мўлжалланган манзилли ижтимоий ёрдам миқдорини солиқ ажратмалари компенсацияси ва қашшоқликни камайтириш учун етарли эмас, деб ҳисоблаган.

Бундан ташқари, уларнинг таъкидлашича, камбағалларга мўлжалланган ижтимоий харажатлар амалда уларга етиб бормаяпти.

Мутахассислар аҳолининг қашшоқ қатламини қўллаб-қувватлаш учун манзилли ижтимоий қўллаб-қувватлов тизимини яхшилашни таклиф қилган.

Бундан ташқари, манзилли ижтимоий ёрдам ҳажмини бюджет маблағлари ҳисобидан ошириш тавсия қилинмоқда. 

 Шунингдек, юқори даромадга эга бўлганлар кўпроқ, камбағал қатлам озроқ солиқ тўлаши учун солиқ тизимини қайта кўриб чиқиш таклиф қилинган.

Top