Makkada sharros yomg‘ir noodatiy toshqinlarni keltirib chiqardi

Shaharning ayrim mavzelarida toshqin sabab harakatlanish butkul to‘xtab qolgan, avtomobillar bo‘yi yarmigacha suv ostida qolgan.

Internetda tarqalgan videolarda Masjidul haromda umra ibodatini ado etayotgan musulmonlar qo‘llarida soyabon bilan Ka'bani tavof qilayotganini ko‘rish mumkin.

Sinoptiklar yarimorol janubidagi yog‘ingarchilik hafta oxirigacha davom etishini aytmoqda. Biroq bu saudiyaliklarni tashvishga solyapti, deb bo‘lmaydi: mahalliy aholi vakillari noodatiy kuchli yomg‘irdan zavqlanayotgani haqida internetda ko‘plab postlar qoldirmoqda.

Ma'lumot uchun, so‘nggi haftalarda podshohlikda koronavirusga chalinish holatlari kuniga o‘rtacha mingtani tashkil etmoqda. Fevral oyida bu ko‘rsatkich o‘rtacha 300 taga, dekabr-yanvar oylarida esa 200 tadan pastroqqa tushgandi.

Saudiya Arabistonida COVID-19 bilan bog‘liq jami 415 mingdan ortiq holat qayd etilgan, 7 mingga yaqin kishi vafot etgan.