Yaman hukumati Sano aeroportini bombardimon qildi. Husiylar Saudiyaga raketa otdi

Zarbalarga qaramay kun oxiriga kelib, Tehrondan husiylar delegatsiyani olib qaytayotgan samolyot Hudaydaga qo‘ndi.

Husiylarning «Al-Masirah» telekanali guruhning transport vaziridan iqtibos keltirgan holda: «Yamanning rasmiy delegatsiyasi hamrohligida bir qator tibbiy bemorlar va chet elda qolib ketgan fuqarolarni olib kelayotgan Eron samolyoti vatan tuprog‘iga qo‘ndi», deb xabar berdi.

Saudiyaga ayblov

Sano aeroportiga berilgan zarbalardan keyin husiylar hech qanday dalil keltirmasdan, hujumda Saudiya Arabistonini aybladi va bunga munosib javob qaytarishlarini bildirdi.

Husiylar harbiy matbuot kotibi Yahyo Sariy: «Bu tajovuz javobsiz va jazolarsiz qolmaydi», deb ogohlantirdi.

Eron ham ushbu zarbalarni qoraladi. Mamlakat tashqi ishlar vazirligi matbuot kotibi Ismoil Baqoiy hujumni «xalqaro huquq va Birlashgan Millatlar Tashkiloti nizomining ochiqdan-ochiq buzilishi, shuningdek, Yamanning milliy suvereniteti va hududiy yaxlitligiga qilingan tajovuz» deb atadi.

Saudiya Arabistoni rasmiylari tomonidan hozircha hech qanday munosabat bildirilgani yo‘q.

Husiylarning javobi

Dushanba kuni kechqurun Yamandagi Saudiya boshchiligidagi kuchlar – husiylar tomonidan qirollikning janubiy mintaqasi tomon otilgan ballistik raketalarni tutib qolganini ma’lum qildi.

Koalitsiya vakili Turki al-Malikiy ijtimoiy tarmoqlarda: «Havo hujumidan mudofaa tizimlari husiy guruhlari tomonidan janubiy hududga qarata otilgan ballistik raketa tahdidini bartaraf etdi», deb yozdi.

Keyinchalik husiylar Saudiya Arabistoni janubidagi Abha xalqaro aeroportini nishonga olib, ballistik raketalar va dronlar yordamida harbiy operatsiya o‘tkazganini ma’lum qildi.

Reutersʼning yozishicha, ushbu hujumlar 2022 yil mart oyida kuchga kirgan norasmiy sulhdan buyon qirollikka qarshi amalga oshirilgan birinchi rasmiy tasdiqlangan hujum bo‘ldi.

Abha mintaqasi – Saudiya Arabistoni janubidagi tog‘li va Yaman bilan chegaradosh bo‘lgan, ko‘plab saudiyaliklar yozgi issiqdan qochish uchun boradigan hudud hisoblanadi.

Saudiyadagi aeroport hududiga yetkazilgan zarar bo‘yicha hozircha tasdiqlangan ma’lumotlar yo‘q.

Husiylar harbiy matbuot kotibi Yahyo Sariy barcha aviakompaniyalarni Saudiya Arabistoni havo hududi uzra uchmaslikdan ogohlantirdi va o‘zi «Sano aeroporti blokadasi» deb atagan vaziyat bartaraf etilmaguncha bu ogohlantirishga jiddiy yondashishga chaqirdi.

Keskinlikning kuchayishi

Shu oy boshida husiylar Saudiya Arabistonini – Sanodan husiylar delegatsiyasini olib havoga ko‘tarilgan Eron samolyotiga hujum qilishda ayblaganidan beri keskinlik kuchaymoqda.

Husiylar o‘shanda, agar Ar-Riyod – Yaman havo hududini buzsa yoki unga yana hujum qilishga urinsa, Saudiya aeroportlari va muhim obektlariga zarba berish bilan tahdid qilgandi.

So‘nggi keskinlashuv Saudiya Arabistoniga husiylarning yangi hujumlari xavfini qayta uyg‘otdi.

Xalqaro tan olingan hukumatning axborot vaziri Muammar bin Mutaxar husiylar Sano aeroportida Xalqaro Qizil Xoch qo‘mitasiga tegishli samolyotni ushlab turgani va uning uchuvchilarini hibsga olganini aytmoqda.

Saudiya boshchiligidagi koalitsiya 2015 yilda husiylar Sanoni egallab, hukumatni ag‘darganidan keyin Yamandagi mojaroga aralashgan edi. Bu urush keng ko‘lamli majburiy ko‘chishlar, vayronagarchiliklar va ocharchilikka sabab bo‘ldi; Birlashgan Millatlar Tashkiloti bu vaziyatni dunyodagi eng og‘ir gumanitar inqirozlardan biri deb ta’riflagan.

Bundan tashqari, o‘tgan yilning oxirida Birlashgan Arab Amirliklari qo‘llab-quvvatlaydigan separatistik harakat janubiy hududlarni egallab, Saudiya boshchiligidagi koalitsiyani parchalab yuborganidan keyin zo‘ravonliklar va keskinlik yana avj olmoqda.

BMTning Yaman bo‘yicha maxsus vakili Xans Grundberg keskinlashuv xavfidan ogohlantirib, uning idorasi tomonlarni jarlik yoqasidan qaytishga ko‘ndirish uchun barcha tomonlar bilan aloqada ekanini aytdi.