Namanganlik o‘quvchi bilimi orqali bir oyda  5 mln so‘m daromad qilyapti

Bu haqida Namangan viloyat xalq ta'limi boshqarmasi axborot xizmati  Kun.uz muxbiriga xabar qildi.

Otabek Usmonov Namangan tumanidagi 16-umumta'lim maktabining 11-sinfida tahsil oladi. O‘z oldiga katta maqsadlar qo‘ygan qahramonimiz muddatidan avval Janubiy Koreyaning  “Songvon” universiteti talabasiga aylandi. 

Koreys tilidan "Topic 2" darajali sertifikatga ega bo‘lib, mazkur til bilan 3 yildan buyon muntazam shug‘ullanib kelayotgan yosh, intiluvchan o‘quvchi o‘z atrofiga umumta'lim maskanidagi tengdoshlari, uka-singillarini jamlagan. Darsdan so‘ng ta'lim maskani direktori Anvarjon Mirzaliyev tomonidan ajratib berilgan xonada koreys tilidan qo‘shimcha saboqlar beradi. 

Ayni paytda o‘zining 9 nafar sinfdoshini ham OTMga kirish imtihonlariga tayyorlamoqda.

Birgina maktabning o‘zida 50 dan ziyod o‘quvchi hamda mahalladoshlariga koreys tilidan saboq bermoqda.

Tinimsiz harakatlari, intilishi va bilimi unga har oyda 5 mln so‘m daromad keltirmoqda.