Imom-xatiblar tashabbusi bilan 16 ming ehtiyojmand oilaga 4 milliard so‘mlik xayriya qilindi
O‘zbekiston musulmonlari idorasi matbuot xizmati imom-xatiblar tomonidan xayr-u saxovatga targ‘ib natijasida ehtiyojmand oilalarga xayriya tadbirlari olib borilayotganini ma'lum qildi.
Ramazon oyining o‘tgan ikki haftasi davomida imom-xatiblar tashabbusi bilan 16 ming ehtiyojmand oilaga 4 milliard so‘mlik xayriya qilingan.
«Ramazon – toat-ibodat oyi bo‘lishi bilan birga saxovat oyi hamdir. Bu paytda mo‘min-musulmon xalqimiz xayriya ishlariga yanada ko‘proq e'tibor beradi. Imom domlalar ham bu oyda saxovatpesha insonlarni ehtiyojmand oilalarga yordam ko‘rsatishga targ‘ib qiladi, hojatbarorlarga beriladigan ajr-u mukofotlar xushxabarini ulashadi.
Ramazon oyida ikki hafta davomida respublikamiz bo‘yicha 16 mingdan ko‘proq oilaga 4 milliard uch yuz milliondan ortiq moddiy yordamlar ko‘rsatildi. Jumladan, ikki milliard yetti yuz milliondan oshiq oziq-ovqat mahsulotlari, uch yuz millionga yaqin uy-ro‘zg‘or buyumlari, bir milliarddan ortiq kiyim-kechak kabi boshqa turdagi mahsulotlar, uch yuz millionga yaqin naqd pul berildi.
Qur'oni karimda marhamat qilinadi: «Ehsonning mukofoti faqatgina ehsondir» (Ar-Rohman surasi, 60-oyat). Ya'ni yaxshilikning mukofoti faqatgina yaxshilikdir. Oyati karimadagi birinchi yaxshilikni bandalar qiladi. Uning ichiga barcha ezgu ishlar kiradi. Ikkinchi yaxshilik esa Alloh taolo yaxshilik qiluvchilarga beradigan jannatdir.
Anas roziyallohu anhudan rivoyat qilinadi: Rasululloh sollallohu alayhi va sallam aytdilar: «Eng afzal sadaqa Ramazonda qilingan sadaqadir». Imom Ahmad va «Sunan» sohiblarining ba'zilaridan qilingan rivoyatda: «Kim bir ro‘zadorga iftorlik bersa, u uchun u (ro‘zador)ning ajridan hech narsa kamaymagan holatda bo‘ladi (yoziladi)», deganlar.
Muqaddas oyning dastlabki haftasida, imom-xatiblar tashabbusi bilan qariyb 2 milliard so‘m xayriya qilingan edi», deyiladi O‘zbekiston musulmonlari idorasi ma'lumotida.
Mavzuga oid
22:50 / 08.10.2024
Siyosiy mahbuslarni qo‘llab-quvvatlashga qaratilgan marafon uch oyda 378 ming yevro to‘pladi
13:08 / 31.08.2024
AQShda shahar hokimiyati 12 yoshli bolaning xayriya do‘konini yopdi. Aholi bola uchun 20 ming dollar yig‘ib berdi
08:23 / 20.08.2024
O‘zbekistonda umumxalq xayriya hashari o‘tkaziladi
13:19 / 03.07.2024