22:57 / 02.05.2021
10825
Италия чемпионати. «Интер» чемпион бўлиб, «Ювентус»нинг 9 йиллик гегемонлигига чек қўйди

Италия А Сериясининг 34-турига келиб чемпион номи аниқ бўлди. Иккинчи ўринда бораётган «Аталанта» меҳмонда «Сассуоло» билан дуранг ўйнади ва чемпион бўлиш учун назарий имкониятни йўқотди. Шу тариқа Миланнинг «Интер» клуби 19-марта Италия чемпиони деган номни қўлга киритди.

Ҳозирда «Интер»да 82 очко бор, «Аталанта»да эса 69 очко. Энди бергамоликлар қолган 4 ўйинда енгиб, «Интер» барча ўйинларни ютқазса ҳам миланликларга етиб олиш имконсиз. Шу тариқа Антонио Конте мураббийлигидаги «Интер» клуби «Ювентус»нинг А Сериядаги гегемонлигига чек қўйди. Охирги марта 2010/11 йилги мавсумда «Милан» Италия чемпиони бўлган, шундай кейин фақат «Ювентус» А Серияда ғолиб бўлиб келаётганди. Қизиғи, 2012 йилда «Ювентус»нинг гегемонлигини мураббий сифатида айнан Антони Конте бошлаб берганди. Мураббий 9 йил ўтиб «Интер» билан ўзи бошлаган гегемонликни тўхтатди.

«Интер» охирги марта 2010 йил Жозе Моуриньо бошчилигида Италия чемпиони бўлганди. Ўшанда жамоа чемпионат ва кубокдан ташқари ЕЧЛда ҳам ғолиб бўлиб, олтин требл қайд этади. Унгача «Интер» кетма-кет 5 йил Италия чемпиони бўлган.

Маълумот учун, А Серияда чемпион бўлиш бўйича «Ювентус» яққол пешқадам ҳисобланади (36 марта). Ҳозиргача «Интер» ва «Милан» 18 тадан соврин билан иккинчиликни бўлишиб турганди. «Интер» бу ғалабадан кейин 19 та скудетто билан ҳамшаҳарини ортда қолдирди. Кейинги ўринда 9 та чемпионлик билан «Женоа» бормоқда.

Top