Moderna nochor davlatlarga 500 mln doza vaksina yetkazib beradi

Vaksinalar va immunizatsiya bo‘yicha global alyans (GAVI) hamda Moderna kompaniyasi COVAX mexanizmi doirasida nochor davlatlarga koronavirusga qarshi 500 mln doza vaksina yetkazib berishga oid kelishuv imzoladi.

29 aprelda Jahon sog‘liqni saqlash tashkiloti Moderna vaksinasini qo‘llash uchun ma'qulladi. 

Vaksina yetkazib berishni 2021 yil 4-choragida boshlash rejalashtirilgan. 2021 yilda 34 mln doza, 2022 yilda esa 466 mln doza vaksina yetkaziladi. Bundan tashqari, Shvetsiya COVAX’ga 1 mln doza AstraZeneca vaksinasini xayriya qilmoqchi.

Avvalroq JSST rahbari Tedros Adanom Gebreyyesus koronavirusga qarshi vaksinalar bilan barcha davlatlarni bir xilda ta'minlab bo‘lmasligidan shikoyat qilgandi. Uning ta'kidlashicha, dunyoda koronavirusga qarshi o‘tkazilgan 832 mln emlashning 82 foizdan ko‘prog‘i yuqori va o‘rta daromadga ega davlatlarga, past daromadga ega davlatlarga esa bor-yo‘g‘i 0,2 foizi to‘g‘ri kelmoqda.