11:05 / 05.05.2021
690
Хоразмда 32 киши номига уларнинг хабардорлигисиз кредит олиб ўзлаштирган шахсларга жиноий иш қўзғатилди
Фото: KUN.UZ

Хоразм вилоятида 32 нафар фуқаро номидан уларнинг хабардорлигисиз кредит олишга эришган МЧЖ ҳисобчиси ва бошқаларга нисбатан жиноят иши қўзғатилган. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар бермоқда.

Маълум қилинишича, Бош прокуратура ҳузуридаги департаментнинг Хоразм вилояти бошқармаси томонидан ўтказилган терговга қадар текширувда, «A.» МЧЖ бош ҳисобчиси Ш.А. ва бошқалар олдиндан тил бириктириб, аслида МЧЖда ишламайдиган 32 киши номига уларнинг хабардорлигисиз кредит олгани аниқланган.

Қайд этилишича, улар сохта маълумотларни тайёрлаб, тижорат банклари филиалларидан жами 1,2 миллиард сўм кредит ажратилишига эришиб, сўнг маблағларни ўзларининг эҳтиёжлари учун ишлатиб юборган.

Таъкидланишича, мазкур ҳолат юзасидан Ш.А. ва бошқаларга нисбатан Жиноят кодексининг 168-моддаси (фирибгарлик) ва 228-моддаси (ҳужжатларни қалбакилаштириш) билан жиноят иши қўзғатилиб, тергов ҳаракатлари ўтказилмоқда.

Top