Pavel Durov Parijda yana so‘roq qilindi

Le Figaro gazetasi manbalariga tayanib xabar berishicha, Fransiya huquqni muhofaza qiluvchi organlari Telegram platformasi orqali sodir etilishi mumkin bo‘lgan jinoyatlarga nisbatan messenjer rahbariyatining ehtimoliy javobgarligi yuzasidan tergovni davom ettirmoqda.

So‘roq yakunlanganidan so‘ng Pavel Durovning uch nafar advokati AFP agentligiga bayonot berib, deyarli ikki yil davom etayotgan tergov davomida ularning mijoziga qo‘yilgan ayblovlarni tasdiqlovchi aniq dalillar taqdim etilmaganini bildirdi.

Himoyachilarning ta’kidlashicha, ular Fransiya sud organlari hamda Yevropa sud instansiyalariga tegishli shikoyatlar kiritgan.

Durovga qo‘yilgan ayblovlar

Pavel Durov 2024 yil 24 avgust kuni Parij aeroportida qo‘lga olingan edi. Fransiya tergovchilari uni Telegram platformasida kontentni yetarlicha nazorat qilmaganlik va huquqni muhofaza qiluvchi organlar bilan hamkorlik qilishdan bosh tortganlikda ayblamoqda.

Tergov fikricha, messenjerda nazoratning yetarli emasligi bolalar pornografiyasi tarqatilishi, giyohvandlik vositalari savdosi, firibgarlik hamda boshqa jinoyatlarga qarshi kurashni qiyinlashtirgan.

Safarga qo‘yilgan cheklovlar bekor qilingan

2025 yil noyabr oyida AFP agentligi Fransiya hukumati Durovning mamlakatdan chiqishiga qo‘yilgan cheklovlarni bekor qilganini xabar qilgan edi. Ilgari unga faqat o‘zi istiqomat qiladigan Dubayga cheklangan safarlarga ruxsat berilgan bo‘lsa, keyinchalik erkin safar qilish va politsiya bo‘limida muntazam ro‘yxatdan o‘tish majburiyati ham bekor qilingan.

Biroq Parij prokuraturasi 2026 yil may oyida mazkur jinoyat ishi hali yopilmaganini va tergov harakatlari davom etayotganini ma’lum qildi.

Rossiyada ham bosim kuchaygan

Shu bilan birga, Telegram Rossiyada ham qator cheklovlarga duch kelmoqda. Mamlakat hukumati 2026 yil fevral oyidan boshlab messenjer faoliyatini sekinlashtirgan. 2025 yil avgustidan esa WhatsApp va Telegram orqali qo‘ng‘iroq qilish xizmati bloklangan.

Rossiya rasmiylari bu qarorlarni firibgarlik holatlariga qarshi kurash bilan izohlagan bo‘lsa, Pavel Durov 2026 yil fevral oyida Rossiyada unga nisbatan terrorizmga ko‘maklashish moddasi bo‘yicha jinoyat ishi qo‘zg‘atilganini ma’lum qilgan.

Rossiya Telegramʼni avval ham 2018–2020 yillar davomida bloklagan edi. O‘shanda kompaniya FXX talabiga ko‘ra foydalanuvchilar yozishmalarini shifrdan chiqarish kalitlarini taqdim etishdan bosh tortgani sabab qilib ko‘rsatilgan edi.