Vazir o‘rinbosari: «Raqamli tibbiyot bemorda ham, shifokorda ham mas'uliyatni oshiradi»

Abdulla Azizovning so‘zlariga ko‘ra, tibbiyotda raqamlashtirish – tibbiy ma'lumotlar bazasini shakllantirish, bu orqali bemorga qo‘yiladigan tashxisning to‘g‘riligini kafolatlash, ushbu ma'lumotlarga asoslanib, ya'ni sun'iy intellekt orqali diagnoz qo‘yishni yo‘lga qo‘yish kabi imkoniyatlarni yaratadi.

«Masalan, Estoniyada avtomatlashtirilgan tizim orqali tashxis qo‘yiladi. Hozirda ular tomonidan qo‘yilayotgan diagnozning 80 foizi to‘g‘ri qo‘yilmoqda. Qolgan 20 foizida shifokor aralashuvi talab etiladi.

Raqamlashtirish bemorda ham o‘z salomatligiga mas'uliyatni oshiradi. Misol uchun, Daniyaga mehmonga borgan onamning tobi qochdi. Antibiotik dorilar olishi kerakligi ma'lum bo‘ldi. U yerda to‘g‘ridan to‘g‘ri borib dori olishning imkoni yo‘q. Lekin shifokordan retsept olish uchun o‘sha yerda yashayotgan akamning yoki mening nomimga yozdirishimiz kerak. Lekin retsept yozilgach, u kasallik tarixida qoladi va qachondir akam yoki men kasal bo‘lsak, shifokor kasallik tariximizdagi o‘sha antibiotik haqida ma'lumot olib, shunga qarab davolaydi. Raqamlashtirish bemorda ham, shifokorda ham mas'uliyat, javobgarlikni birinchi o‘ringa chiqaradi.

O‘zbekistonda esa 12 varaqli daftar bizning kasallik tariximiz hisoblanadi. Hech qanday javobgarlik yo‘q. Istalgan odam istalgancha antibiotik olishi mumkin. Rivojlangan davlatlarda bu faqat shifokor retsepti bilangina olinadi», deya uning so‘zlarini keltirmoqda Kun.uz muxbiri.

 Vazir o‘rinbosari O‘zbekistonda tibbiyotni raqamlashtirish tizimi Toshkent shahrida, Andijon va Navoiy viloyatlarida yaxshi yo‘lga qo‘yilayotganini ta'kidladi. Surxondaryo va Qashqadaryo viloyatlarida esa texnik omillar sabab ortda qolish kuzatilgan.

«Bu tizim faqat qaysidir hudud uchun joriy qilinmaydi. Butun respublika bo‘ylab yo‘lga qo‘yiladi. Masalan, «Elektron shifoxona» platformasi Toshkentda ishlab, Qoraqalpog‘istonda ishlamasa, barcha harakatlarimiz befoyda. Hammasi qog‘ozda qolaveradi. Eski tizim, noto‘g‘ri tashxislash amalda qolaveradi. Shuning uchun barcha viloyatlarni bir xilda qamrab olishni maqsad qilganmiz», dedi Abdulla Azizov.