19:59 / 04.07.2021
3358
Бразилия олий суди Болсонаруга нисбатан тергов олиб боришга рухсат берди

Бразилия олий суди мамлакат президенти Жаир Болсонаруга нисбатан тергов олиб боришга рухсат берди. Болсонару ҳукумат томонидан коронавирусга қарши Ҳиндистонда ишлаб чиқилган Covaxin вакцинаси сотиб олинишидаги эҳтимолий қонунбузарликларни эътиборга олмасликда гумон қилинмоқда.   

Фото: AFP /EVARISTO SA

The Wall Street Journal нашрининг ёзишича, прокуратура президент соғлиқни сақлаш вазирлиги мансабдор шахслари томонидан унга маълум қилинган эҳтимолий қонунбузарликларни эътиборсиз қолдиргани ёки йўқлигини аниқламоқчи. Ўтган ҳафта соғлиқни сақлаш вазирлиги ходими Луис Миранда қонунбузарликларга қарамай, вазирликнинг Bharat Biotech ҳинд компанияси вакцинасининг импорт қилинишини талаб қилган бошқа ходимлари босимига учраганини маълум қилган.

Шартномага кўра, Бразилия Covaxin вакцинаси етказиб берилгандан 30 кун ўтиб пулни тўлаши керак бўлган. Бироқ соғлиқни сақлаш вазирлиги ҳали етказиб берилмаган вакцина учун ҳисоб олган. Ҳисобда кўрсатилган вакцина миқдори шартнома тузишда томонлар келишгандан фарқ қилган. Конгресснинг ушбу иш бўйича терговида иштирок этаётган сенаторлар ушбу ғализликлар вакциналар сотиб олишдаги эҳтимолий коррупция ҳолатларига ишора қилиши мумкинлигини айтишган ва у бўйича тергов ўтказишга чақиришган.

Миранданинг таъкидлашича, у 20 март куни президент билан учрашиб, унга шартнома ва вакцина учун тақдим қилинган ҳисоблардаги фарқлар ҳақида хабар қилган. Болсонару ушбу ишни федерал полицияга топширишга ваъда берган. Полиция эса ушбу иш бўйича тергов бошланишини 30 июндагина эълон қилган.

Болсонару матбуот хизмати президентга қарши тергов бошланишига изоҳ беришдан бош тортди. Президентнинг ўзи эса аввалроқ ушбу иш бўйича унга қарши тергов бошланиши мумкинлигини унинг ҳукуматини ағдаришга “аҳмоқона” уриниш деб атаганди. Мутахассисларнинг таъкидлашича, Болсонаруга нисбатан ушбу тергов унга айблов билдирилиши билан якунланиши даргумон. Бразилияда президентга қарши жиноий айбловлар конгресс қуйи палатасининг учдан икки қисми томонидан қўллаб-қувватлангандагина билдирилиши мумкин. Бироқ қуйи палата ҳозирда президент тарафдорлари томонидан назорат қилинади.

Top