21:37 / 04.07.2021
5819
Филиппиндаги авиаҳалокат қурбонлари сони 45 нафарга етди

Қутқарувчилар Филиппин ҳарбий-ҳаво денгиз кучлари самолёти қулаган жойда 42 ҳарбий ва 3 фуқаронинг жасадини топишди. Шунингдек, 5 ҳарбий бедарак йўқолган, деб ҳисобланмоқда.

Фото: REUTERS

Аввалроқ С-130 ҳарбий самолёти Холо оролига қўниш вақтида ҳалокатга учрагани маълум қилинганди. Самолёт Кагаян-де-Оро шаҳридан 96 ҳарбийни Холо оролига олиб кетаётган бўлган. Ҳарбийлар оролга экстремистлар ва айирмачиларга қарши кураш учун йўналаётган бўлган. Маълумотларга кўра, самолёт аэропортга қўниш вақтида учиш-қўниш йўлагидан ўтиб кетган ва яқин орадаги қишлоққа бориб урилган. Шундан кейин воқеа жойида ёнғин чиққан.

CNN Philippines телеканали маълумотларига кўра, ҳалокатда тирик қолган 49 ҳарбийдан 32 нафари Замбоанга шаҳридаги шифохонага етказилган. Воқеа жойида қидирув ишлари давом этмоқда.

Фото: REUTERS

Филиппин мудофаа вазири Делфин Лорензана қутқарув амалиёти тугаши биланоқ воқеа тафсилотларини ўрганиш бўйича тергов ўтказишни буюрган. Таъкидланишича, бу Филиппинда жорий йилда ҳарбий авиатехника билан юз бераётган тўртинчи бахтсиз ҳодисадир. Охирги бундай авиаҳалокат 2 ҳафтагина олдин юз берган: 24 июнда пойтахт Манила яқинида S-70i Black Hawk ҳарбий вертолёти қулаши оқибатида 6 киши ҳалок бўлган.

Фото: REUTERS

Мамлакат парламенти вакиллар палатасининг мудофаа ва хавфсизлик бўйича қўмитаси раиси ўринбосари Раффи Биазоннинг таъкидлашича, келгусида бундай ҳодисалар такрорланмаслиги учун охирги авиаҳалокатлар терговини икки карра тезлаштириш зарур. “Ушбу ҳалокатлар сабабини, хоҳ инсон хатоси, хоҳ техника носозлиги ёки об-ҳаво шароити бўлсин, аниқлаш лозим. Агар ҳалокатларга техника ишламай қолгани сабаб бўлса, бу харид қилинган мулк сифати бўйича саволлар туғдиради. Агар бунга экипаж хатоси сабаб бўлса, унда шахсий таркиб тайёргарлигини қайта кўриб чиқишга тўғри келади”, деб таъкидлаб ўтган Биазон.

Top