Jon Kerri Moskvaga tashrif buyuradi

Kerri Moskvada Rossiya prezidentining xalqaro tashkilotlar bo‘yicha maxsus vakili Anatoliy Chubays va iqlim masalalari bo‘yicha maxsus vakili Ruslan Edelgeriyev bilan uchrashuv o‘tkazadi.

Foto: RIA Novosti / Ramil Sitdikov

AQShning sobiq davlat kotibi Jon Kerri kelasi haftada Moskvaga tashrif buyuradi, deb xabar berdi RBK o‘z manbalariga tayanib.

AQSh prezidenti Jo Bayden Kerrini iqlim masalalari bo‘yicha maxsus vakil lavozimiga tayinlagandi. RBK manbalarining so‘zlariga ko‘ra, Kerri Moskvada Rossiya prezidentining xalqaro tashkilotlar bo‘yicha maxsus vakili Anatoliy Chubays bilan uchrashadi. 13 iyul kuni esa Rossiya prezidentining iqlim masalalari bo‘yicha maxsus vakili Ruslan Edelgeriyev bilan uchrashuv o‘tkazilishi rejalashtirilgan.

Jon Kerri AQSh davlat kotibi lavozimida ishlagan vaqtida Rossiyaga bir necha marta kelgan.

22–23 aprel kunlari AQSh prezidenti tashabbusi bilan virtual shaklda global iqlim sammiti o‘tkazildi. Unda 40 mamlakat rahbarlari qatnashdi.