Iroqqa tegishli neft kemasi Fors ko‘rfazida yonib ketdi. Baghdad Al Yaum portalining xabar berishicha, yong‘in oqibatida kema ekipajining barcha 9 a'zosi halok bo‘lgan.
Ta'kidlanishicha, yong‘in sabablari haqida hozircha hech narsa ma'lum emas.
Pors Media direktori Anmar al-Safiyning ta'kidlashicha, ijtimoiy tarmoqlarda kemaga o‘t qo‘yilgani haqida xabarlar tarqalgan, biroq ular hozircha na tasdiqlangan va na inkor etilgan.
Ayni vaqtda mahalliy hokimiyat voqea tafsilotlarini aniqlash bilan shug‘ullanmoqda.
2 iyunda Ummon ko‘rfazida Eronning eng yirik harbiy kemasi “Kharg” cho‘kib ketgandi. Bunga kemada mashg‘ulotlar vaqtida yong‘in chiqishi sabab bo‘lgan. Hodisa Jask porti yaqinida yuz bergan.