Toliblar Afg‘oniston hukumatiga tinchlik sulhi taklif qilgani to‘g‘risidagi xabarni rad etdi

Avvalroq hukumat delegatsiyasi a'zosi Nodir Nodiriy toliblar hibsda saqlanayotgan jangarilarni ozod qilish evaziga uch oylik tinchlik sulhini taklif qilganini aytgandi.

Foto: AP

"Tolibon" harakati Afg‘oniston hukumati delegatsiyasi a'zosi Nodir Nodiriyning toliblar Kobulga tinchlik sulhini taklif qilgani aytilgan bayonotini rad etdi. Bu haqda Ariana News telekanali xabar berdi.

"Bu haqiqatga to‘g‘ri kelmaydi", - deya "Tolibon" rasmiy vakili Zabihulla Mujohiddan iqtibos keltirdi telekanal.

Payshanba kuni Dohada toliblar bilan muzokaralarda qatnashayotgan Afg‘oniston hukumati delegatsiyasi a'zosi Nodir Nodiriy toliblar 7 ming nafar mahbusni ozod qilish evaziga uch oylik tinchlik sulhini taklif qilganini aytgandi.

Nodir Nodiriy «Tolibon» taklifini jiddiy deb atagan, biroq o‘tgan safar 5 ming nafar mahbus ozod qilinganidan so‘ng «vaziyat yengillashish o‘rniga yanada keskinlashgani»ni eslatib o‘tgandi.