Lukashenko radioaktiv moddalar kontrabandasi bilan tahdid qilmoqda – Litva tashqi ishlar vaziri

Belarus Litvaga radioaktiv moddalarni kontrabanda qilish bilan tahdid qilmoqda. Litva tashqi ishlar vaziri Gabrielyus Landsbergis ana shunday bayonot bilan chiqdi.

"Lukashenko Litvaga radioaktiv moddalarni kontrabanda qilish, Litva orqali giyohvand moddalarni o‘tkazish bilan tahdid qilmoqda", — deb ta'kidladi u.

Landsbergisning fikricha, bu tahdidlar Litvaga qarshi hibrid urush vositasi hisoblanadi.

"Bir yarim oy avval Minskka qo‘nishga majburlangan samolyot ana shunday vosita bo‘lgandi. Bugun esa migrantlar. Lukashenko yana yangi vositalar o‘ylab topishi mumkin", — dedi u.

May oxirlarida Belarus prezidenti Aleksandr Lukashenko uning mamlakati Litvaga giyohvand moddalar va noqonuniy migrantlar o‘tishida to‘siq bo‘lganini, ammo g‘arbning siyosiy bosimi tufayli to‘siq vazifasini bajarishni to‘xtatishini aytgandi.