17:43 / 23.07.2021
17835
Дунё спортининг катта вакили. Оксана Чусовитина қандай спорт йўлини босиб ўтган?

Бугун, 23 июль куни Токио-2020 олимпиадасининг очилиш маросими ўтказилмоқда. Турнир бошланиши олдидан Ўзбекистон делегацияси байроқдорлари сафидан чиқарилган бўлса-да, Оксана Чусовитинанинг ушбу турнирдаги иштироки ўзбек спорти учун катта воқелик бўлди. Тўрт йилликнинг энг нуфузли мусобақаси олимпия ўйинларида 8-марта иштирок этаётган афсонавий спортчи интервьюларидан бирида Ўзбекистон учун медаль ютишни орзу қилишини айтганди.

Фото: Tribuna.uz

Байроқдорлар охирги кунда ўзгартирилди

Токио-2020 олимпиадасида Ўзбекистон делегацияси байроқдорлари гимнастикачи Оксана Чусовитина ва боксчи Бобоусмон Батуров бўлиши ҳақида хабар қилинган эди. Бироқ очилиш маросимидан олдин байроқдорлар ўзгаргани, Чусовитина ва Батуров ўрнига боксчи Баҳодир Жалолов ва таэквондочи Нигора Турсунқулова танлангани маълум қилинди.

Баҳодир Жалолов ва Нигора Турсунқулова

46 ёшли гимнастикачи «Спутник» нашри билан суҳбатда бу қарорни кутмагани ва бу борада унга ҳеч қандай тушунтириш берилмагани ҳақида гапирган. «Биласизми, байроқдорлар нега алмаштирилганини тушунтиришмади, шунчаки бормаслигимни айтишди, бор гап шу. Иштиёқим сўнди, бундай қилиш нотўғри. Шунчаки тўғрисини тушунтиришса, ҳаммамиз ҳам одам, тушунамиз», деган спортчи.

Миллий олимпия қўмитаси Ўзбекистон делегациясининг Токио-2020 Олимпия ўйинларида байроқдори ўзгаргани юзасидан расмий баёнот бериб, бу ўзгаришни тақвим билан изоҳлади.

«Эртадан Токио-2020 Олимпия ўйинлари доирасида ҳамюртларимиз ўз иштирокларини бошлашади. Аввал МОҚ томонидан бўлажак Олимпия ўйинларида байроқдорларимиз боксчи Бобоусмон Батуров ҳамда спорт гимнастикаси вакили Оксана Чусовитина бўлиши маълум қилинган эди. Регламентга кўра, спорт гимнастикаси ва бокс баҳслари 24 июлдан бошланади. Оксана Чусовитина эса 25 июль куни саралаш босқичида қатнашади. Шу боисдан Токио-2020 штаби ва федерация раҳбарлари билан маслаҳатлашган ҳолда ҳамюртларимиз Оксана Чусовитина ҳамда Бобоусмон Батуровни ортиқча толиқтирмаслик мақсадида старти кейинроққа тўғри келадиган бошқа номдор вакилларимиз, боксчимиз Баҳодир Жалолов ва таэквондочи Нигора Турсунқулова делегациямиз байроқдори бўладиган бўлди. Бу бўйича якуний қарор 21 июль куни қабул қилинди.

Очилиш маросимида иштирок этиш катта вақт олади. Унда узоқ муддат тик оёқда туриш ва шаҳарчага кеч қайтилишини инобатга олиш зарур. Маълумот учун, Нигора Турсунқулова 26 июль куни баҳсларга киришса, Баҳодир Жалолов 29 июлдан ўз иштирокини бошлайди. Шу боис уларнинг тикланиб олиши учун вақт нисбатан кўпроқ.

Ҳамюртларимиздан вазиятни тўғри баҳолаб, бўлажак Олимпия ўйинларида терма жамоамиз вакилларини доимо қўллаб-қувватлаб туришларини сўраб қоламиз», дейилган расмий муносабатда.

Кўп ўтмай спортчининг ўзи видеомурожаат қилиб, олимпиада ўйинлари очилиш арафасида уни қўллаб-қувватлаётган барча ватандошларга, мухлисларига мурожаат қилиб, миннатдорлик билдирди ва спортчи учун тинчлик муҳим эканини айтди.

«Азиз мухлисларим! Қўллаб-қувватлаганингиз учун барчангизга раҳмат. Келинг, кайфиятни туширмаймиз, бугун очилиш маросими. Биз уни узоқ вақт кутдик. Хурсанд бўлиб ҳаммани қўллаб-қувватлайлик. Тез орада мусобақалар бошланади ва бизга яхши иштирок учун хотиржамлик керак. Яна бир бор раҳмат, ҳаммангизни қучиб қоламан, ҳаммамизга омад», деган Чусовитина МОҚ саҳифаларида эълон қилинган видеомурожаатда.

Фото: Instagram

Оксана Чусовитина айни дамда германиялик мураббий Дитер Кох қўл остида олимпиадага тайёргарлик кўрмоқда.

Юқорида Оксана Чусовитинанинг ушбу олимпия ўйинларида иштирок этиши ўзбек спорти учун катта воқелик экани бежиз таъкидланмади. Оксана 4 йилликнинг энг нуфузли спорт мусобақасида 8-марта қатнашмоқда. Бу бир инсоннинг туғилиб, камолга етиб, куч-қувватга тўлганчалик вақт ва бу давр ичида ҳамиша юқори формада бўлишгина эмас, балки доим совриндор бўлиш чинакам афсоналарга хос натижа.

Профессионал фаолияти давомида МДҲ бирлашган жамоаси, Германия ва Ўзбекистон сафида олимпиада ва турли халқаро турнирларда иштирок этган Оксана Чусовитина 1992 йил МДҲ бирлашган жамоаси сафида Барселона олимпиадасида чемпион бўлган. 2008 йил Пекин олимпиадасида Германия сафида кумуш медални қўлга киритган. Уч карра жаҳон ва Европа чемпиони, жаҳон чемпионатининг тўрттадан кумуш ва бронза медалларига эга чиққан.

Чусовитина илк бор олимпиадада 1992 йил дебют қилган ва Барселона олимпиадасида собиқ иттифоқ давлатларининг бирлашган жамоаси сафида олтин медални қўлга киритган. Ўшандан буён ҳеч бир олимпия ўйинлари Чусовитинасиз ўтмаяпти.

2008 йил Пекинда Германия номидан мусобақаларда қатнашган Чусовитина яна бир бор олимпия шоҳсупасидан жой олиб, кумуш медални қўлга киритади. У ўша кунларни шундай хотирлайди: «Немис жамоасининг бир қисми бўлсам-да, лекин ҳар доим Ўзбекистонни ватаним деб билганман. Мен Германиядан миннатдорман, улар ўғлимни қутқаришга ёрдам беришди, уларнинг гимнастика федерацияси билан ҳамон яхши муносабатдаман. Ўғлим Алишер тузалгач, мен Ўзбекистонга қайтдим ва улар мени тушунишди».

Ҳа, Чусовитина фарзандининг саломатлигини қутқариб қолиш учун Германия шарафини ҳимоя қилишга мажбур бўлганди.

Оксана Чусовитина 2016 йилги олимпия ўйинларида қатнашиши билан спорт гимнастикаси тарихида ўзига хос янги рекордни қайд этди. У еттита олимпиадада қатнашган ягона спортчи сифатида Гиннеснинг рекордлар китобига кирди. Шунингдек, Риода олимпиадалар тарихидаги энг ёши катта гимнастикачига айланди.

Чусовитина Токио олимпиадасига йўлланмани қўлга киритиб, ўз натижасини янгилади. У бу натижага Германиянинг Штутгарт шаҳрида спорт гимнастикаси бўйича ўтказилган жаҳон чемпионатида эришди.

Оксана Чусовитина интервьюларидан бирида Токиодаги ўйинлар ўзининг охирги олимпиадаси бўлишини маълум қилган: «Бу менинг сўнгги олимпиадам бўлади, катта спортни тарк этаман. Мен Ўзбекистонда болалар ва ўсмирлар спортини ривожлантиришга ёрдам бериб, қўлимдан келган барча ишни қиламан», деганди спортчи.

Ўтган йили Оксана Чусовитина 45 ёшга тўлиши муносабати билан дунё спорт жамоатчилиги унга табриклар йўллаб қутлаган, The Times Hub газетаси сайтида эса Чусовитинага бағишланган мақола эълон қилинган эди.

«Собиқ иттифоқ вақтида совринлар ютишни бошлаган Чусовитина 2018 йилда Осиё ўйинларида ҳам совриндор бўлди», дейилади «Доимо ёш гимнаст. Том Круз билан учрашувни кутаётган Чусовитина 45 ёшда. Аммо у 8-олимпия ўйинлари томон кетмоқда» сарлавҳали мақолада.

Унинг ҳозирча қўлга киритган охирги ғалабаси 2021 йил июн ойида Қатар пойтахти Доҳа шаҳрида спорт гимнастикаси бўйича жаҳон кубоги босқичидаги ғолиблиги бўлиб турибди. Спортчи таяниб сакраш йўналишида биринчи ўринни қўлга киритганди.

Мавзу
Токио Олимпиадаси
Пандемия туфайли қолдирилган 2020 йилги Ёзги Олимпиада 2021 йил 23 июлида Япониянинг Токио шаҳрида расман бошланади.
Барчаси
Top