Afg‘onistondagi aeroport snaryadlardan o‘qqa tutildi

Afg‘onistonning Qandahor shahri aeroportiga kamida uchta snaryad bilan zarba berildi. Snaryadlardan ikkitasi aeroportning uchish-qo‘nish yo‘lagiga tushgan.

Qandahor shahri aeroporti / Foto: Spc. Jerry T. Combes

Hujum 1 avgustga o‘tar kechasi amalga oshirilgan. Buning oqibatida aeroportdan amalga oshirilishi kerak bo‘lgan barcha reyslar bekor qilingan.

Aeroport rahbarining ta'kidlashicha, hozirda uchish-qo‘nish yo‘lagini ta'mirlash ishlari olib borilmoqda va aeroport o‘z ishini 1 avgust kechga yaqin davom ettirishi kutilmoqda.

Avvalroq Afg‘onistonning Hirot shahrida BMT qarorgohiga hujum uyushtirilgandi. Hujum davomida bir nafar afg‘on politsiyachisi halok bo‘lgan, yana bir necha zobit yaralangan. BMT xodimlaridan hech kimga shikast yetmagan. Hujumdan oldin ushbu hududda hukumat kuchlari va “Tolibon” o‘rtasida janglar borgan. BMTda ta'kidlanishicha, hujumga hukumatga qarshi kuchlar aloqador.