Minskdagi do‘konlar peshtaxtalaridan Ukraina, Litva va Polsha mahsulotlarini olib tashlash talab qilindi

Hukumat Minskdagi do‘konlarni «eng yaxshi peshtaxtalarga» Belarusga qarshi sanksiyalar kiritgan mamlakatlar mahsulotlarini joylashtirishda ayblamoqda, deb yozadi «Belarus segodnya».

«Bugun qator mamlakatlar — Ukraina, Litva, Polsha bizga qarshi sanksiyalar kiritgan — ularning mahsulotlari esa do‘konlarning eng yaxshi peshtaxtalarida turibdi! O‘zimizning mahsulotlarni esa qidirish kerak. Shuning uchun do‘konlar oldiga keskin talab qo‘ydik: yoki vaziyat o‘zgarishi kerak yoki biz chora ko‘ramiz», — deya Minsk shahar ijroiya qo‘mitasi raisi Vladimir Kuxarevning so‘zlaridan iqtibos keltiradi nashr.

Uning so‘zlariga ko‘ra, butun mamlakat miqyosida ana shunday qaror qabul qilish vaqti keldi.

Belarusga qarshi Yevroittifoq, AQSh, Buyuk Britaniya va Kanada sanksiyalar kiritgan, shuningdek, Litva, Polsha va Ukraina alohida choralar haqida e'lon qilgan.