Italiyada keng ko‘lamli o‘rmon yong‘inlariga qarshi kurash olib borilmoqda

Italiyalik o‘t o‘chiruvchilar 12 avgustga o‘tar kechasi 500dan ko‘proq o‘rmon yong‘iniga qarshi kurash olib borganini ma'lum qilishdi. Yong‘inlar 4 kishining o‘limiga sabab bo‘lgan.

Italiya o‘t o‘chirish xizmatining xabar berishicha, oxirgi 12 soat ichida 528ta o‘rmon yong‘ini yuz bergan, ulardan 230tasi Sitsiliya orolida qayd etilgan. Shuningdek, Kalabriya oblastida 100ga yaqin yong‘in o‘chog‘i haqida ma'lum qilingan.

Oxirgi kunlarda Italiyada “Lyutsifer” deb nomlangan antitsiklon davom etmoqda. 11 avgustda Sitsiliyada havo harorati 48,8 darajaga yetdi. Bu esa Yevropa uchun yangi antirekord hisoblanadi.

Ob-havo mutaxassislarining prognoziga ko‘ra, Italiyada yomon ob-havo yana bir necha kun davom etishi mumkin. Bu esa yanada ko‘proq yong‘in chiqishiga olib kelishi mumkin.

Ayni vaqtda Italiyadan tashqari, Gretsiya, Chernogoriya, Jazoir va Shimoliy Makedoniyada ham o‘rmon yong‘inlari bilan og‘ir vaziyat kuzatilmoqda.

#Italiya #o‘rmon yong‘inlari