Prezident Ulug‘bek Rashidov va Bahodir Jalolov ishtirokidagi finallarni qanday kuzatganini so‘zlab berdi

13 avgust kuni prezident Shavkat Mirziyoyev ishtirokida XXXII yozgi olimpiada o‘yinlari ishtirokchi va g‘oliblari, ularning ota-onalari hamda murabbiylarini taqdirlash marosimi bo‘lib o‘tdi.

Marosimda davlat rahbari olimpiya o‘yinlarida g‘olib bo‘lgan sportchilarning ishtirokini qanday kuzatgani haqida gapirib berdi, deya xabar bermoqda Kun.uz muxbiri.

“To‘g‘risi, Ulug‘bekning (Ulug‘bek Rashidovning – tahr.) jangida oxirgi raundni ko‘rolmadim ham. Yutqazib qo‘yishidan xavotirlandim. Bahodirning jangida ham shunday bo‘ldi. Birinchi raunddan keyin Bahodir yutqazayotgandi, to‘g‘risi, keyingi raundlarni ko‘rolmadim. Lekin unga ishondim.

Final jangidan bir kun oldin Bahodirga telefon qilmoqchi bo‘ldim. Telefon qilib, unga aytmoqchi edimki: “Bahodir, sening zarbangni qabul qilgan sportchi hech qachon esdan chiqarmaydi, unutolmaydi”. Xudoga shukr, baribir Bahodir yutdi”, – dedi prezident.

Shavkat Mirziyoyev, shuningdek, Tokio olimpiadasida oltin medalga sazovor bo‘lgan yana bir o‘zbekistonlik sportchi Akbar Jo‘rayev haqida ham to‘xtalib o‘tdi.

“Sportda hali kamchilik, nuqsonlarimiz juda ko‘p. Men ularni to‘g‘rilash bo‘yicha topshiriqlar berdim.

Akbar Jo‘rayev oltin medal olganda yig‘ilish o‘tkazayotgandim, ko‘rdilaring. Menga oltin olganimiz haqida kichik ma'lumot olib kelishdi. Juda xursand bo‘lib ketdim, yig‘ilish ham to‘xtab qoldi.

Men sportda yo‘l qo‘yilgan kamchiliklar uchun vazirlar, hokimlar va boshqa mutasaddilarni tergab, choralar ko‘rmoqchi edim. Ularning baxti bor ekan. Sen shunga sababchi bo‘lding. Bo‘lmasa, hamma ishdan ketardi”, – deya Akbar Jo‘rayevga olimpiadadagi natijasi uchun minnatdorchilik bildirdi Shavkat Mirziyoyev.

Ma'lumot uchun, olimpiada o‘yinlarida ishtirok etgan sportchilar – Ulug‘bek Rashidov (taekvondo), Akbar Jo‘rayev (og‘ir atletika) va Bahodir Jalolov (boks) g‘olib chiqib, O‘zbekiston delegatsiyasiga 3ta oltin medalni taqdim etishdi.