«Bu sportimiz tarixida ulkan natija» – Shavkat Mirziyoyev sportchilarning olimpiadadagi ishtirokini yuqori baholadi

Bugun, 13 avgust kuni prezident Shavkat Mirziyoyev ishtirokida XXXII yozgi olimpiada o‘yinlari ishtirokchi va g‘oliblari, ularning ota-onalari hamda murabbiylarini taqdirlash marosimi bo‘lib o‘tmoqda.

Kun.uz muxbiriga ko‘ra, marosimda davlat rahbari sportchilarning nufuzli musobaqadagi ishtirokini yuqori baholab, bu mustaqillikning 30 yilligiga munosib sovg‘a bo‘lganini ta'kidlagan.

«Barchamiz dunyodagi eng nufuzli ana shu musobaqalarda O‘zbekiston vakillarining har bir chiqishini katta qiziqish va hayajon bilan kuzatib bordik.

O‘z navbatida, sportchilarimiz ham bunday yuksak ishonchni oqlab, xalqimizga yorqin g‘alabalarni tortiq́ etishdi.

Hech shubhasiz, bu vatanimiz mustaqilligining 30 yillik shonli bayramiga munosib sovg‘a bo‘ldi», dedi prezident.

Davlat rahbari sportchilarning olimpiada o‘yinlarida 3ta oltin va 2ta bronza medalni qo‘lga kiritganini alohida ta'kidlar ekan, bu borada O‘zbekistonning o‘rni MDH va Markaziy Osiyoda yuqori bo‘lganiga ham e'tibor qaratdi.

«Hammamizga ayonki, xalqaro olimpiya o‘yinlarida yer yuzining eng zo‘r, manaman degan sport ustalari ishtirok etadi.

Buyuk Alisher Navoiy bobomiz aytganlaridek, sherga qarshi sherdek kurashish, jang qilish kerak. Sizlar dunyo tan olgan sportchilar bilan mardona olishib, ularning o‘zini ham, ular erishgan natijalarni ham ortda qoldirib, 3ta Olimpiya rekordini yangilab, jahon sportida ham yorqin sahifa ochdingiz.

Mamlakatimiz jamoasi 200dan ziyod davlatdan kelgan eng kuchli sportchilar orasida umumjamoa hisobida – o‘ttiz ikkinchi, Mustaqil Davlatlar Hamdo‘stligida – ikkinchi, Markaziy Osiyoda esa – birinchi o‘rinni egalladi. Bu chindan ham o‘zbek sporti tarixidagi ulkan natijadir.

G‘olib farzandlarimiz sha'niga madhiyamiz yangrab, Vatanimiz bayrog‘i baland ko‘tarilgan damlarda, barchamizning qalblarimiz cheksiz g‘ururga to‘ldi.

Bugungi tantanali marosimda ishtirok etayotgan qahramon o‘g‘lonlarimiz – Tokio olimpiadasi g‘oliblari haqida har qancha faxrlanib gapirsak arziydi, albatta», dedi Shavkat Mirziyoyev.

Marosimda davlat rahbari olimpiya o‘yinlarida g‘olib bo‘lgan sportchilarning ishtirokini qanday kuzatgani haqida gapirib berdi.

«To‘g‘risi, Ulug‘bekning (Ulug‘bek Rashitovning – tahr.) jangida oxirgi raundni ko‘rolmadim ham. Yutqazib qo‘yishidan xavotirlandim. Bahodirning jangida ham shunday bo‘ldi. Birinchi raunddan keyin Bahodir yutqazayotgandi, keyingilarini ko‘rolmadim. Lekin ishondim.

Jangidan bir kun oldin Bahodirga telefon qilmoqchi bo‘ldim. Telefon qilib, unga aytmoqchi edimki, «Bahodir seni zarbangni qabul qilgan sportchi hech qachon esdan chiqarmaydi, unutolmaydi».

Bilasizlar, Bahodirning jangi kuni Turkmanistonda, Markaziy Osiyo davlatlari rahbarlari yig‘ilishida edim. Men ularga aytdimki, «Bahodir baribir yutadi». Ular mendan bu ishonchning sababini so‘raganda aytdimki, agar hakamlar haqqoniy bo‘lsa, bizning bokschi albatta yutishini aytdim», dedi prezident.