KXShT Afg‘onistondagi vaziyat tufayli navbatdan tashqari sessiyasini o‘tkazadi

Sessiya Tojikiston prezidenti Emomali Rahmon raisligida bo‘lib o‘tadi.

Kollektiv xavfsizlik shartnomasi tashkiloti (KXShT) 23 avgust kuni Afg‘onistondagi vaziyatni muhokama qilish uchun navbatdan tashqari sessiyasini o‘tkazadi. Bu haqda KXShT matbuot kotibi Vladimir Zaynetdinov ma'lum qildi.

“23 avgust kuni videokonferensiya rejimida Kollektiv xavfsizlik shartnomasi tashkilotining navbatdan tashqari sessiyasi bo‘lib o‘tadi. Unda Afg‘onistondagi vaziyat va uning KXShTga a'zo davlatlar xavfsizligiga ta'siri muhokama qilinadi”, – dedi u.

Zaynetdinovning ma'lumot berishicha, sessiya Tojikiston prezidenti Emomali Rahmon raisligida bo‘lib o‘tadi.

KXShTga Qozog‘iston, Rossiya, Armaniston, Belarus, Qirg‘iziston va Tojikiston a'zo hisoblanadi.