Prezident: «Hududlarda chiqindi masalasi bilan viloyat hokimlari shaxsan shug‘ullanadi»

Prezident ekologiya muammolariga bag‘ishlangan yig‘ilishda chiqindilarni yig‘ish va qayta ishlash masalasiga ham to‘xtalib o‘tdi. Bu borada davlat-xususiy sheriklik yo‘lga qo‘yilgan joylarda tartib yaxshilangan.

«Chiqindilarni yig‘ish va qayta ishlash bo‘yicha yo‘l qo‘yilgan qoloqliklar yil yakuniga qadar bartaraf etilishi shart. Misol uchun, Namangan shahar, To‘raqo‘rg‘on, Mingbuloq va Namangan tumanlarida xususiy sheriklik tizimi to‘liq o‘zini oqlagan. Jumladan, ushbu hududlarda aholini sanitar tozalash xizmatlari bilan qamrab olish darajasi, o‘tgan 6 oyda 79 foizdan 92 foizga yetib, tushumlar 2 baravarga oshgan.

Yoki Farg‘onada ham xususiy sheriklar tomonidan 7 milliard so‘mlik investitsiya jalb qilinib, vodiyda ilk bor chiqindilarni saralash zavodi ishga tushirilgan.

Endi hududlarda chiqindi masalasi bilan viloyat hokimlari shaxsan shug‘ullanadi, so‘rov ham ulardan bo‘ladi», dedi davlat rahbari.

Viloyat hokimlari kelgusi yilda sohada xususiy sektor ulushini 60 foizga yetkazish va 6,5 mingta yangi ish o‘rinlari yaratishga shaxsan mas'ul bo‘ladi.

«Yana bir masala – tibbiyot chiqindilarini qayta ishlashga ham xususiy sheriklarni jalb qilib, 27 ming tonna xavfli tibbiyot chiqindilarini yo‘q qilishni yo‘lga qo‘yish zarur.

Uch oy muddatda tibbiyot chiqindilarini qayta ishlashda kamida 5 ta xususiy sheriklarni aniqlab, loyihalarni boshlansin. Ekologiya sohasida ilm va innovatsiyalarni rivojlantirish zarur», dedi prezident.

Ilm va innovatsiyalar har bir sohada zarur. Lekin bugungi kunda Ekologiya qo‘mitasi tizimidagi 2 mingdan ortiq xodimlarning atigi 10 foizi mutaxassis hisoblanadi.

Shu bois, qo‘mita huzuridagi ilmiy-tadqiqot instituti faoliyatini takomillashtirish, olimlar va kadrlar tayyorlashni rivojlantirish bo‘yicha ko‘rsatmalar berildi.

Buning uchun mazkur ilmiy-tadqiqot instituti zamonaviy texnika va laboratoriya uskunalari bilan jihozlanadi. Doktoranturaga kvotalar 2 baravar oshiriladi. Institutda ekologiya va atrof-muhit muhofazasi bo‘yicha ilmiy darajalarni beruvchi Ilmiy kengash tashkil etiladi.