Yangi Toshkent hududining 30 foizi bog‘ va xiyobonlar uchun ajratiladi

Yangi Toshkent aholisi zarur xizmatlardan piyoda yoki velosipedda 15 daqiqa ichida foydalanish imkoniyatiga ega bo‘ladi. Bu haqda AOKAda o‘tkazilgan brifingda Yangi Toshkent direksiyasi axborot xizmati rahbari Shahnoza Nurmatova ma’lum qildi.

Yangi Toshkentda yashil qurilish konsepsiyasini joriy etish O‘zbekistonning iqlim barqarorligi strategiyasining muhim tarkibiy qismidir. Shaharni barqaror rivojlantirishda energiya samaradorligi va qayta tiklanuvchi manbalardan foydalanish ustuvor yo‘nalishdir.

Shaharning energiya ta’minoti deyarli 100 foiz qayta tiklanuvchi energiya manbalariga asoslanadi. Birinchi bosqichda paxta poyalaridan ishlab chiqariladigan bioyonilg‘i asosidagi trigeneratsiya qurilmasi ishga tushiriladi. Bu inshoot 50 MVt issiqlik va 27 MVt elektr energiyasi bilan ta’minlaydi.

Quyosh elektr stansiyalari va gidroelektr quvvatlari orqali shaharga 1 GVt dan ortiq yashil energiya yetkazib beriladi. Energiya uzluksizligini ta’minlash maqsadida yirik energiya saqlash tizimlari o‘rnatiladi.

Loyiha doirasida birinchi bosqichda yerning 30 foizi yashil park va xiyobonlar uchun ajratiladi. Binolarda yashil tom texnologiyasi joriy etilib, ularning jazirama yoz kunlarida salqinlikni saqlashiga xizmat qiladi. Bu innovatsion yechim shaharning iqlimiy barqarorligini oshiradi va energiya tejamkorligini ta’minlaydi.