Imomali Rahmon Afg‘onistonda ushbu mamlakat tojiklari ishtirokida inklyuziv hukumat tuzishni taklif qildi

Tojikiston prezidenti Imomali Rahmon Pokiston tashqi ishlar vaziri Shoh Mahmud Qurayshiyni qabul qildi, deb xabar berdi Aziya-Plyus.

Qayd etilishicha, suhbat davomida Afg‘onistondagi vaziyat muhokama qilindi.

Tomonlar Afg‘oniston gumanitar inqiroz yoqasida turgani hamda afg‘on muammosi mintaqaviy va dunyoviy muammoga aylanganini ta'kidladi.

Tojikiston tomoni mamlakatdagi xavfsizlik muammosini hal qilish uchun barcha milliy ozchilik, ayniqsa, Afg‘oniston aholisining 46 foizdan ko‘prog‘ini tashkil etuvchi tojiklar ishtirokidagi inklyuziv hukumat tuzish zarurligini bildirdi. 

“Tojiklar Afg‘onistonning bo‘lajak hukumatida munosib o‘rin egallashi darkor. Tojikiston butun afg‘on xalqi, barcha milliy ozchilik nuqtayi nazari hisobga olinmagan, ta'qib qilish va ajratib qo‘yish yo‘li bilan tuzilgan hech qanday boshqa hukumatni hech qachon tan olmaydi”, deyiladi Tojikiston  prezidenti matbuot xizmati xabarida.

Qayd etilishicha, faktlar toliblar mamlakatning boshqa siyosiy kuchlari ishtirokidagi vaqtinchalik o‘tish hukumatini tuzish to‘g‘risidagi avvalgi va'dalaridan voz kechib, islom amirligini tuzishga tayyorlanayotganini ko‘rsatmoqda.