Toshkentda ichki ishlar xodimining burniga boshi bilan zarba bergan fuqaroga nisbatan jinoiy ish ochildi

Qayd etilishicha, 28 avgust kuni Yangihayot tumani IIO FMB patrul-post xizmati xodimlari, safdor H.I. va F.X. Yangihayot tumani Sputnik-15 massividagi 12-son avtobus parki yaqinida tungi vaqtdagi piyoda patrullash davomida xatti-harakatlari bilan shubha uyg‘otgan ikki nafar fuqaro, 27 yoshli T.N. va 30 yoshli U.G.ni ko‘rib qolgan.

Bildirilishicha, xodimlar fuqarolarning yoniga kelib, o‘zlarini tanishtirgan hamda jamoat joyida niqobsiz yurish ma'muriy huquqbuzarlik hisoblanishi haqida ogohlantirgan. So‘ng fuqarolarning shaxslarini aniqlash maqsadida ular tuman IIO FMB ichki ishlar bo‘limiga taklif qilingani aytiladi.

“Ammo yigitlar bu iltimosga javoban qo‘pol tarzda qarshilik ko‘rsatib, xodimlarning qonuniy talablariga bo‘ysunmadilar. T.N. boshi bilan safdor H.I.ning burun qismiga zarba berib, unga badan shikasti yetkazdi. T.N. va U.G.ning voqea joyiga yetib kelgan patrul-post xizmati xodimlari tomonidan qo‘lga olinish jarayoni videoga tushib qolgan. Huquqbuzarlar IIBga, jabrlanuvchi esa – tibbiyot muassasasiga yetkazildi”, deyiladi ma'lumotda.

Ta'kidlanishicha, mazkur fakt bo‘yicha to‘plangan hujjatlar Yangihayot tumani prokuraturasiga yo‘naltirilgan. Yangihayot tumani prokuraturasi tomonidan T.N.ga nisbatan Jinoyat kodeksining 219-moddasi 2-qismi («Hokimiyat vakiliga yoki fuqaroviy burchini bajarayotgan shaxsga qarshilik ko‘rsatish») bo‘yicha jinoyat ishi qo‘zg‘atilgan.