23:30 / 19.09.2021
4445
Шимолий Корея қурол урани ишлаб чиқариш ҳажмини оширмоқчи - ОАВ
Фото: РИА Новости

Шимолий Корея ядро бомбалари яратишда қўлланувчи уранни бойитиш бўйича заводини кенгайтирмоқда. Бу ҳақда сунъий йўлдошлардан олинган суратлар ва мутахассислар ҳисоботларига таяниб AP ахборот агентлиги хабар берди.  

Мутахассисларнинг таъкидлашича, Пхеньян Йонбендаги ядро объектида қурол урани ишлаб чиқариш ҳажмини 25 фоизга оширмоқчи. 1 сентябрда сунъий йўлдошдан олинган суратда завод ҳудудида дарахтлар чопиб ташлангани ва қурилиш учун майдонча тайёрлангани акс этган.

14 сентябрда олинган суратда эса объект пойдевори қуриб бўлинганини кўриш мумкин. Таъкидланишича, бўлғуси объектнинг майдони 3 минг квадрат метрни ташкил қилади. Мутахассисларнинг ҳисоб-китобига кўра, бу майдон уранни бойитиш учун минглаб янги центрифугаларни жойлаштириш учун етарли ҳисобланади.

Аввалроқ Атом энергияси бўйича халқаро агентлик Шимолий Корея Йонбендаги қурол плутонийси ишлаб чиқара оладиган атом реакторини қайта ишга туширганини маълум қилган. Реактор Шимолий Корея раҳбари Ким Чен Ин ва АҚШнинг ўшандаги президенти Дональд Трамп ўртасидаги биринчи учрашувдан ярим йил ўтиб 2018 йил декабрда тўхтатиб қўйилганди.

Top