AQSh Moliya vazirligi “Tolibon” harakati va “Haqqoniy tarmog‘i” guruhi bilan Afg‘onistonda cheklangan moliyaviy amaliyotlar o‘tkazishga ruxsat berdi. Biroq bu amaliyotlar insonparvarlik amaliyotlarini o‘tkazish, Afg‘onistonga dori-darmon va qishloq xo‘jaligi mahsulotlarini yetkazish bilan bog‘langan bo‘lishi kerak.
Ta'kidlanishicha, vazirlik e'lon qilgan ruxsatnomalardan biri Afg‘oniston aholisining gumanitar ehtiyojlarini osonlashtirish uchun AQShga, nohukumat va xalqaro tashkilotlarga, jumladan, BMTga toliblar va “Haqqoniy tarmog‘i” bilan bitimlar tuzishga ruxsat beradi. Shuningdek, “Tolibon” va “Haqqoniy tarmog‘i” to‘g‘ridan to‘g‘ri yoki bilvosita tarzda 50 foiz yoki undan ko‘proq aksiyasiga ega bo‘lgan tashkilotlar bilan ham bitim tuzishga ruxsat beriladi.
Ikkinchi ruxsatnoma Afg‘onistonga qishloq xo‘jaligi mahsulotlari, dori-darmon, tibbiy uskunalarni eksport va reeksport qilish bilan bog‘langan cheklangan sondagi amaliyotlarni o‘tkazish imkonini beradi.
Toliblar hokimiyat tepasiga kelgandan keyin Oq uy Afg‘oniston hukumatining AQSh banklarida saqlanuvchi pullarini muzlatib qo‘ygandi. Shuningdek, Xalqaro valuta jamg‘armasi o‘z tomonidan Afg‘onistonga yordam berishni to‘xtatib qo‘ygan.
