Qoʻshimcha funksionallar
-
Tungi ko‘rinish
AQShda tor xonada bir necha yil saqlangan 16 bola topildi
AQShda shokka tushiruvchi voqea sodir bo‘ldi: Ohayo shtatida huquq-tartibot idoralari xodimlari 16 nafar bolani topdi, tergov ma’lumotlariga ko‘ra, ular bir necha yil davomida axlat va chiqindilar orasida bir xonada saqlangan.
Amerika Qo‘shma Shtatlarining Ohayo shtatida huquq-tartibot idoralari xodimlari bir necha yil davomida deyarli bir xonada o‘ta antisanitariya sharoitida yashagan 16 nafar bolani aniqladi. Ularning yoshi 18 oylikdan 18 yoshgacha.
Associated Press xabariga ko‘ra, politsiyachilar Xamden qishlog‘idagi uyni tintuv qilish paytida bolalarni topib olgan. Tergov ma’lumotlariga ko‘ra, ular axlat va inson chiqindilari orasida saqlangan, yaxshi parvarish qilinmagan va tashqi dunyodan deyarli butunlay ajratilgan. Ularning ko‘pchiligi rivojlanishda jiddiy orqada qolgan, ba’zilari esa hech qachon maktabga bormagan.
Topilgandan so‘ng, barcha bolalar ijtimoiy xizmatlar nazoratiga topshirildi. Yetti nafari shifoxonaga yotqizildi, ikki nafarining ahvoli og‘ir.
Ish bo‘yicha to‘rt nafar katta yoshli shaxs - bolalarning ota-onasi, shuningdek, buvisi va bobosi hibsga olingan. Ularga voyaga yetmaganlarning hayoti va sog‘lig‘iga tahdid solish bo‘yicha 16 ta ayblov e’lon qilindi. Barcha ayblanuvchilar aybsiz ekanligini aytdi.
Tergov davom etmoqda. Huquq-tartibot idoralari bolalar qanday qilib ijtimoiy xizmatlar e’tiborini tortmagan holda bunday sharoitda uzoq vaqt qolib ketganini aniqlamoqda.
