Farg‘onada askiya san'ati markazi ochiladi, «San'atkorlar xiyoboni» barpo etiladi

“Ma'lumki, Farg‘onadan yetishib chiqqan Yusufjon qiziq Shakarjonov, Usta Olim Komilov, Muhiddin qori Yoqubov, Tamaraxonim, Mukarrama Turg‘unboyeva, Halima Nosirova, Lutfixonim Sarimsoqova, Nabi Rahimov, Jo‘raxon Sultonov, Ma'murjon Uzoqov, Rahima Mazohidova, Murodjon Ahmedov, Tavakkal Qodirov singari ulug‘ san'atkorlar o‘zining yuksak san'ati bilan xalqimizning mehrini qozongan. Hozir ham bu sohada ko‘plab umidli yoshlar voyaga yetib kelmoqda.

Shu ma'noda, ulug‘ san'atkorlarning nomlarini abadiylashtirish maqsadida  Marg‘ilon shahar “Ijodkorlar bog‘i” hududida ularning byustlarini o‘rnatib, “San'atkorlar xiyoboni”ni barpo etsak, o‘ylaymanki, sizlarga ham manzur bo‘ladi.

O‘z davrida madaniyat va san'at yo‘nalishidagi ta'lim muassasalari ulug‘ san'atkorlar nomi bilan atalgan edi. Endilikda ularni qayta nomlab, aziz xotiralari o‘z o‘rniga qo‘yiladi.

Yusufjon qiziq Shakarjonov nomini abadiylashtirish hamda Farg‘ona vodiysida askiya va qiziqchilik san'ati ta'limida seleksiya ishlari yo‘lga qo‘yilib, askiya san'ati markazi ochiladi. 

Tobora noyob bo‘lib borayotgan milliy dorbozlik va polvonlik an'analarini saqlab qolish hamda targ‘ib qilish maqsadida har ikki yilda bir marotaba “Maydon tomoshalari” festivali yo‘lga qo‘yiladi”, dedi prezidentlikka nomzod.