Kongo daryosida tunda sol cho‘kishi oqibatida 51 kishi halok bo‘ldi, 69 kishi bedarak yo‘qolgan deb hisoblanmoqda.
Foto: France 24
Kongo demokratik respublikasining Mongala provinsiyasi gubernatori vakili Nestor Magbadoning ma'lum qilishicha, bedarak yo‘qolganlar soni taxminiy bo‘lib, u solning o‘lchamidan kelib chiqib baholangan. Sol 9ta an'anaviy yog‘och kanoedan tashkil topgan bo‘lib, ular bir-biri bilan bog‘langan bo‘lgan.
Magbadoning ta'kidlashicha, 39 kishi omon qolgan. Uning aytishicha, qidiruv-qutqaruv ishlari davom etmoqda, biroq tirik qolganlarni topishga umid tobora so‘nib bormoqda.
Falokatga sol haddan ortiq yuklangani va yomon ob-havo sabab bo‘lgani taxmin qilinmoqda. Provinsiya ma'muriyati fojia munosabati bilan 11 oktyabrdan 3 kunlik motam e'lon qildi.
