19:29 / 15.10.2021
10736
Лавров аралаш никоҳдан туғилган болаларга автоматик равишда Россия фуқаролигини беришни таклиф қилди

Ҳозирда аралаш никоҳдан туғилган бола Россия ҳудудида дунёга келса, автоматик равишда Россия фуқаролигини олади. Бола хорижда туғилган тақдирда Россия фуқаролиги автоматик равишда эмас, балки ота-онанинг танловига кўра олинади.

Фото: Getty Images

Аралаш никоҳдан туғилган болалар дунёга келган жойидан қатъи назар, автоматик равишда Россия фуқаролигини олишлари керак, деди Россия ташқи ишлар вазири Сергей Лавров.

«Аралаш оила қаерда яшамасин, бола аралаш никоҳдан қаерда туғилмасин – хоҳ Россия, хоҳ хорижий давлат ҳудудида — у конституцияга мувофиқ автоматик равишда Россия фуқаролигини олиши шарт», — деди у.

Лавровнинг таъкидлашича, аралаш никоҳдан туғилган болаларга фуқаролик бериш «амалга ошириш кўзланган навбатдаги қадам» ҳисобланади.

Унинг сўзларига кўра, Россия қонунчилари ватандошларни қўллаб-қувватлаш доирасида ушбу ташаббусни амалга оширишни режалаштирмоқда.

Ҳозирда мамлакат қонунчилигига кўра, аралаш никоҳдан туғилган бола Россия ҳудудида дунёга келса, автоматик равишда Россия фуқаролигини олади. Бола хорижда дунёга келган тақдирда Россия фуқаролиги автоматик равишда эмас, балки ота-онанинг танловига кўра олинади. Бунинг учун Россия фуқароси бўлган ота ёки онанинг аризаси ва унинг хорижлик турмуш ўртоғининг розилиги лозим бўлади.

Top