«Qonun talabi shunday» - MSK raisi o‘rinbosari mustaqil tashabbuskorlarning prezidentlikka nomzod ko‘rsatolmasligi haqida

23 oktabr kuni Toshkentdagi simpoziumlar saroyida Markaziy saylov komissiyasi raisi Zayniddin Nizomxo‘jayev ishtirokida matbuot anjumani o‘tkazildi.

Anjumanda saylovni o‘tkazishga tayyorgarlik holati borasida mahalliy va xalqaro OAV vakillari hamda xorijiy kuzatuvchilarga ma'lumot berildi, deya xabar bermoqda Kun.uz muxbiri.

Matbuot anjumani davomida jurnalistlar tomonidan O‘zbekistondagi saylovlarda mustaqil tashabbuskorlarga prezidentlikka nomzod ko‘rsatish imkoniyati berilmasligi, shuningdek, og‘ir jinoyati uchun qamoq muddatini o‘tayotganlarning saylovda ovoz berolmasligi borasida savol bilan murojaat qilindi.

Savollarga Markaziy saylov komissiyasi raisi o‘rinbosari Bahrom Qo‘chqorov javob berdi. U prezidentlikka mustaqil tashabbuskorlar tomonidan nomzod ko‘rsatilishiga amaldagi qonunlarda cheklov borligini qayd etdi.

«Qonun talabi shunday. Markaziy saylov komissiyasi esa qonunga izoh berishdan xoli. Qonunda esa prezidentlikka nomzod ko‘rsatish uchun faqat siyosiy partiyalar haqli ekani belgilab qo‘yilgan», – dedi Qo‘chqorov.

MSK mulozimi, shuningdek, og‘ir jinoyat sodir etgan va qamoq muddatini o‘tayotganlarning nega saylovda ishtirok etolmasligiga ham to‘xtalib o‘tdi.

«Bu yilgi saylovlarda birinchi bor og‘ir bo‘lmagan jinoyatlarni sodir etgan fuqarolarga saylovda ovoz berish huquqi berildi. Balki bu masala ham qonun chiqaruvchi organlar tomonidan ko‘rib chiqilar. Bu masala ham jamoatchilik va ekspertlar tomonidan ko‘tarilib, muhokama qilinishi kerakdir.

Qonun chiqaruvchi organlar bekorga bu cheklovlarni qo‘ymagan. Bunga ma'lum sabablar bor. Balki, kelajakda bu masala ko‘rib chiqilar», – dedi Bahrom Qo‘chqorov.