Xalq ta'limi sohasida pedagoglar bilimini aniqlash maqsadida 5ta test markazi tashkil etiladi

Qayd etilishicha, xalq ta'limi muassasalarida faoliyat olib borayotgan rahbar va pedagog xodimlarning fan yo‘nalishlari hamda tegishli mutaxassisliklari bo‘yicha bilim darajasi va malaka toifasini aniqlash maqsadida zamonaviy test markazlarini tashkil etish tizimi joriy qilinmoqda. 

Xalq ta'limi vazirligi, A.Avloniy nomidagi Xalq ta'limi muammolarini o‘rganish va istiqbollarini belgilash ilmiy-tadqiqot instituti hamda O‘qituvchilar uyushmasi huzuridagi Bilim va ko‘nikmalarni baholash markazi o‘rtasida davlat-xususiy sheriklik tamoyillari asosida loyiha amalga oshirilmoqda.

Loyiha doirasida ilk bosqichda Toshkent shahrida, keyinchalik Qoraqalpog‘iston Respublikasi, Samarqand, Qashqadaryo va Namangan viloyatlarida jami 5 ta zamonaviy test markazlari ishga tushiriladi.

Testlar sun'iy intellekt yordamida yuzdan tanish texnologiyalari bilan jihozlangan va onlayn monitoring olib boriladigan test markazlarda amalga oshiriladi. 

Vazirlik ma'lumotida aytilishicha, ushbu loyiha yordamida pedagoglar bilimini baholash jarayonida inson omili maksimal kamaytiriladi.