Urganchda sandrujina va sanpostlar tashkil qilinadi

Urganch shahridagi korxonalar va ta'lim muassasalarida maxsus sanitariya tuzilmalari tashkil etiladi. Ular favqulodda vaziyatlarda jabrlanganlarga dastlabki tibbiy yordam ko‘rsatish bilan shug‘ullanadi.

Urganch shahar hokimining sanitar drujinalar va sanitar postlari haqidagi qarori qabul qilindi. Unga ko‘ra, Qizil Yarim Oy Jamiyati bilan hamkorlikda «Urganch yog‘-moy» AJ hamda Urganch Davlat Universitetida 24 kishidan iborat sanitar drujinalari, shuningdek, 1-, 3-, 10- va 22-son umumiy o‘rta ta'lim maktablarida 4 kishidan iborat bo‘lgan sanitar postlari tashkil etiladi.

Sanitar drujinalar va sanitar post xodimlarining vazifasi favqulodda vaziyatlarda jabrlanganlarga malakali va ixtisoslashtirilgan dastlabki tibbiy yordam ko‘rsatish, shuningdek, ularning xavfsiz evakuatsiyasini ta'minlashdan iborat bo‘ladi.

Sanitar drujinalar va sanitar postlar jamoatchilik asosida, korxona va ta'lim dargohlari xodimlaridan tashkil etiladi. Ular maxsus tayyorgarlikdan o‘tkaziladi, moddiy-texnik vositalari, kiyim-bosh va boshqa zarur ashyolar bilan ta'minlanadi.

«O‘zbekiston Respublikasi Favqulodda vaziyatlarning oldini olish va bunday vaziyatlarda harakat qilish davlat tizimini yanada takomillashtirish to‘g‘risida»gi Vazirlar Mahkamasi qarori bilan tasdiqlangan Nizomda shaharlardagi korxona va muassasalarda fuqaro muhofazasining shtatdan tashqari sanitar tuzilmalarini tuzish va shaxsiy tarkibini boshlang‘ich maxsus tayyorgarlik o‘quv qurslaridan o‘tkazish, sanitar tuzilmalarning favqulodda vaziyatlarda harakat qilishga tayyorgarlik darajasini oshirish hamda doimiy shayligini ta'minlash choralari belgilab qo‘yilgan.