Урганчда сандружина ва санпостлар ташкил қилинади

Урганч шаҳридаги корхоналар ва таълим муассасаларида махсус санитария тузилмалари ташкил этилади. Улар фавқулодда вазиятларда жабрланганларга дастлабки тиббий ёрдам кўрсатиш билан шуғулланади.

Урганч шаҳар ҳокимининг санитар дружиналар ва санитар постлари ҳақидаги қарори қабул қилинди. Унга кўра, Қизил Ярим Ой Жамияти билан ҳамкорликда «Урганч ёғ-мой» АЖ ҳамда Урганч Давлат Университетида 24 кишидан иборат санитар дружиналари, шунингдек, 1-, 3-, 10- ва 22-сон умумий ўрта таълим мактабларида 4 кишидан иборат бўлган санитар постлари ташкил этилади.

Санитар дружиналар ва санитар пост ходимларининг вазифаси фавқулодда вазиятларда жабрланганларга малакали ва ихтисослаштирилган дастлабки тиббий ёрдам кўрсатиш, шунингдек, уларнинг хавфсиз эвакуациясини таъминлашдан иборат бўлади.

Санитар дружиналар ва санитар постлар жамоатчилик асосида, корхона ва таълим даргоҳлари ходимларидан ташкил этилади. Улар махсус тайёргарликдан ўтказилади, моддий-техник воситалари, кийим-бош ва бошқа зарур ашёлар билан таъминланади.

«Ўзбекистон Республикаси Фавқулодда вазиятларнинг олдини олиш ва бундай вазиятларда ҳаракат қилиш давлат тизимини янада такомиллаштириш тўғрисида»ги Вазирлар Маҳкамаси қарори билан тасдиқланган Низомда шаҳарлардаги корхона ва муассасаларда фуқаро муҳофазасининг штатдан ташқари санитар тузилмаларини тузиш ва шахсий таркибини бошланғич махсус тайёргарлик ўқув қурсларидан ўтказиш, санитар тузилмаларнинг фавқулодда вазиятларда ҳаракат қилишга тайёргарлик даражасини ошириш ҳамда доимий шайлигини таъминлаш чоралари белгилаб қўйилган.